ایڈیشنل ڈسٹرکٹ اینڈ سیشن جج ساؤتھ کی عدالت نے دوران سماعت سوال کیا کہ کراچی کے فلیٹ میں مردہ حالت میں ملنے والی اداکارہ حمیرا اصغر کے گھر والوں سے پوچھیں وہ مقدمہ درج کرانا چاہتے ہیں یا نہیں؟
اداکارہ حمیرا اصغر کی لاش ملنے کے واقعے پر قتل کا مقدمہ درج کرنے کی درخواست کی سماعت میں پولیس نے رپورٹ عدالت میں جمع کرا دی ہے۔
رپورٹ میں کہا گیا ہے کہ حمیرا اصغر کے گھر والوں سے رابطہ ہوا ہے، لاش کا پوسٹ مارٹم ہو چکا ہے، حتمی فرانزک رپورٹ کا انتظار ہے۔
جس کے بعد ایڈیشنل ڈسٹرکٹ اینڈ سیشن جج ساؤتھ کی عدالت نے حمیرا اصغر کیس کی تفصیلی رپورٹ 16 اگست کو طلب کر لی۔
دوسری جانب پولیس ذرائع کا کہنا ہے کہ حمیرا اصغر کے فلیٹ میں 3 سے 4 جگہ مٹی کے برتن میں سفید پاوڈر ملا ہے جسے تجزیے کے لیے لیبارٹری بھیجا جائے گا۔
واضح رہے کہ 8 جولائی کو اداکارہ حمیرا اصغر کی لاش کراچی کے علاقے ڈیفنس فیز 6 میں ایک فلیٹ سے ملی تھی، وہ گزشتہ 7 سال سے اس کرائے کے فلیٹ میں مقیم تھیں۔
ایس ایس پی ساؤتھ مہزور علی کے مطابق خاتون فلیٹ میں 7 سال سے اکیلی رہ رہی تھیں، 2018ء میں فلیٹ کرائے پر لیا تھا اور وہ 2024ء سے کرایہ نہیں دے رہی تھیں۔
کلفٹن کنٹونمنٹ بورڈ میں مالک مکان نے کیس کیا تھا، بیلف آیا تو دروازہ بند تھا، دروازہ نہ کھلنے پر توڑا گیا تو کمرے میں زمین پر اداکارہ حمیرا اصغر کی لاش پڑی تھی۔
