لاہور:
لاہور میں جعلی پولیس والوں کی اغواء برائے تاوان کی کوشش ناکام ہوگئی، اصل پولیس نے رنگے ہاتھوں گرفتار کرلیا۔
ڈولفن اسکواڈ نے بروقت کارروائی کرتے ہوئے اغوا برائے تاوان کی کوشش ناکام بنائی۔
ندیم شہید چوک کے قریب مشکوک گاڑی کو روک کر مغوی بازیاب کروا لیا گیا، مغوی عرب جان کو جعلی پولیس اہلکار ہتھکڑی لگا کر پشاور لے جا رہے تھے۔ ملزمان نے خود کو پولیس اہلکار ظاہر کر کے فیکٹری سے مغوی کو اغوا کیا۔
ڈولفن ٹیم 206 کی مہارت سے مشکوک گاڑی AS-223 کو روکا گیا اور گاڑی میں موجود چار اغوا کار گرفتار کرکے مغوی بحفاظت بازیاب کروا لیا گیا۔
ملزمان کا تعلق خیبر ایجنسی کے مختلف علاقوں سے ہے۔ گرفتار اغوا کاروں میں شفیع اللہ، طلا جان، اسرار خان اور زیدان شامل ہیں۔ گرفتار ملزمان کو کارروائی کے لیے تھانہ ساؤتھ کینٹ کے حوالے کر دیا گیا۔
ڈولفن ٹیم 206 کے وقاص، جنید، آصف اور ابرار نے کارروائی میں حصہ لیا۔ ڈی آئی جی آپریشنز فیصل کامران نے بروقت رسپانس پر ایس پی ڈولفن ارسلان زائد کی ٹیم کو شاباش دی۔
ڈی آئی جی آپریشنز نے کہا کہ ملزمان کے خلاف سخت سے سخت قانونی کارروائی عمل میں لائی جا رہی ہے، شہریوں کی حفاظت کے لیے لاہور پولیس ہر وقت الرٹ ہے، لاہور میں نہ کوئی بدمعاش ہے نہ ہی قانون شکنی کی گنجائش ہے، قانون شکنی پر زیرو ٹالرنس پالیسی ہے۔
