امریکا کے صدر ڈونلڈ ٹرمپ نے وال اسٹریٹ جرنل اخبار اور اسکے مالک روپرٹ مرڈوک کیخلاف دس ارب ڈالر ہرجانے کا مقدمہ دائر کردیا۔
اخبار نے دعویٰ کیا تھا کہ صدر ٹرمپ نےکمسنوں سے جنسی تعلق میں ملوث بدنام زمانہ جیفری ایپسیٹین کو سن دوہزار تین میں اسکی پچاسویں سالگرہ پر تحفہ بھیجا تھا۔
اخبار کے مطابق سالگرہ پر بھیجے گئے اس کارڈ میں لکھا تھا کہ جیفری، ہم میں بہت سی چیزیں مشترک ہیں، زندگی کے معنی سب کچھ حاصل کرنے سے زیادہ ہونے چاہیں، سالگرہ مبارک ہو اور میری خواہش ہے کہ تمہارا ہر روز شاندار رازوں سے بھرا ہو۔
اخبار کا دعویٰ تھا کہ اس نے ٹائپ شدہ خط دیکھا ہے جس پر خاتون کی برہنہ تصویر کا اسکیچ ہے اور اس پر ٹرمپ نے ڈونلڈ لکھ کر دستخط کیے تھے۔
دوسری جانب صدر ٹرمپ نے اس بات کی تردید کی ہے کہ انہوں نے ایپسٹین کو سالگرہ پر خط بھیجا تھا اور یہ بھی کہ انہوں نے تصویر بھی نہیں بنائی تھی۔
صدر ٹرمپ نے اخبار وال اسٹریٹ جرنل، ڈاو جونز اور روپرٹ مرڈوک کیخلاف مقدمہ فلوریڈا کے سدرن ڈسٹرکٹ کورٹ میں دائر کیا ہے اور اخبار کےدعوے کو جھوٹا اور توہین آمیز قرار دیا ہے۔
ٹرمپ نے فاکس کارپوریشن کےسربراہ روپرٹ مرڈوک کا نام لیتے ہوئے کہا کہ وہ متمنی ہیں کہ روپرٹ مرڈوک کو عدالت میں پیش ہوکر گواہی دیتا دیکھیں، یہ بہت دلچسپ تجربہ ہوگا۔
امریکی صدر نے کہا کہ انہوں نے اخبار، اسکے مالک اور ایڈیٹر کو خبردار کیا تھا کہ یہ خط نہ چھاپیں کیونکہ یہ جھوٹ کا پلندہ ہے، انہوں نے زندگی میں کبھی کوئی تصویر بنائی ہی نہیں اور یہ بھی کہ وہ عورتوں کی تصویروں کے اسکیچ نہیں بناتے۔
ٹرمپ نے کہا کہ جو زبان ان سے منسوب کی گئی ہے وہ بھی انکی نہیں، وہ ایسے الفاظ لکھتے ہی نہیں۔
کیلیفورنیا کے گورنر گیون نیوسم نے ردعمل میں وہ تصویر جاری کی جو صدر ٹرمپ نے مبینہ طور پر ایک چیریٹی کو عطیہ کی تھی۔
سابق رکن کانگریس ایڈم کنزنگر نے بھی درجنوں تصاویر پوسٹ کرتے ہوئے دعویٰ کیا کہ ٹرمپ کو ڈرائنگ کرنا بہت پسند ہے۔
