امریکی ریاست فلوریڈا سے تعلق رکھنے والی لڑکی نے 10 فٹ لمبے مگرمچھ سے مقابلہ کرکے اپنی جان بچا لی۔
غیر ملکی میڈیا رپورٹس کے مطابق والٹن کاؤنٹی شیرف کے دفتر کا کہنا ہے کہ 10 فٹ لمبے مگرمچھ نے 15 سالہ سمر ہینوٹ پر حملہ کردیا تھا، تاہم اس کی حاضر دماغی اور ہمت نے اس کی جان بچالی۔
میڈیا رپورٹس کے مطابق متاثرہ لڑکی کا کہنا ہے کہ میں پونڈ کریک (تالاب) میں تیراکی کے لیے گئی تھی جہاں مگر مچھ نے مجھے پر حملہ کردیا۔ اس نے میری ٹانگ پر حملہ کیا اور مجھے پانی کے اندر لے جا کر بری طرح جھنجھوڑنے لگا۔
امریکی لڑکی کے مطابق اس وقت میں نے اپنی حاضر دماغی کا استعمال کرتے ہوئے مگرمچھ کے سر پر مکے برسانا شروع کردیے جس پر ایک بار تو مگر مچھ نے مجھے چھوڑ دیا لیکن اگلے ہی لمحے مجھ پر پھر دوبارہ حملہ کردیا۔
لڑکی نے مزید بتایا کہ جب مگرمچھ نے دوسری بار حملہ کیا تو میں نے دوبارہ سے خود کو بچانے کی کوشش کی، اسی دوران جیسے ہی مگر مچھ نے اپنی گرفت کو ہلکا کیا میں فوری موقع دیکھ کر بھاگ نکلی اور پانی سے باہر آگئی۔
میڈیا رپورٹس کے مطابق یہ واقعہ فلوریڈا کے پونڈ کریک میں 22 جون کو ڈیسٹن سے تقریباً 25 میل دور پیش آیا تھا۔ تاہم لڑکی کو فوری طور اسپتال منتقل کیا گیا جہاں اب وہ خطرے سے باہر ہے۔
