اسلام آباد:
وفاقی وزیر برائے موسمیاتی تبدیلی مصدق ملک نے پاکستان میں ہونے والی موسمیاتی تبدیلیوں او ر اس کی بڑھتی ہوئی سنگینی سے متعلق ہوشربا حقائق بے نقاب کرتے ہوئے خبردار کیا ہے کہ مون سون کے ابھی 4 سے 5 اسپیل آنے باقی ہیں اور اگلے برسوں سے مون سون سیزن نہ صرف جلد آیا کرے گا بلکہ اس کی شدت میں بھی اضافہ ہو گا۔
وفاقی وزیر برائے موسمیاتی تبدیلی مصدق ملک نے پروگرام سینٹر اسٹیج میں گفتگو کرتے ہوئے کہا کہ مون سون میں شدت آتی جائے گی، پہلے مون سون کے 5 اسپیل آتے تھے جو اب بڑھ جائیں گے، ابھی مزید اسپیل آئیں گے۔
وفاقی وزیر مصدق ملک نے صورت حال کی سنگینی سے آگاہ کرتے ہوئے کہا کہ اہم بات یہ ہے کہ مون سون کے ابھی 4 سے 5 اسپیل آنے باقی ہیں اور آگے مون سون کی شدت میں اضافہ ہو گا۔
انہوں نے کہا کہ مون سون کا پیٹرن بھی بدل رہا ہے، ا گلے برسوں سے مون سون سیزن جلد آیا کرے گا، بارشوں کے راؤنڈ بھی بڑھتے جا رہے ہیں۔
ان کا کہنا تھا کہ جو کلاؤڈ برسٹ سندھ میں ہوا تھا وہ ابھی چکوال میں نہیں ہوا، سندھ میں جو کلاؤڈ برسٹ ہوا تھا اس سے تو بڑی تباہی آئی تھی، چکوال میں بارش اور گلیشئر سے آنے والے پانی کا معاملہ نہیں ہے، چکوال میں کلاؤڈ برسٹ کا معاملہ ہوا ہے۔
وفاقی وزیر مصدق ملک نے کہا کہ فوج اور این ڈی ایم اے والے بر وقت امداد کے لیے پہنچ رہے ہیں، ہم نقصان کم سے کم ممکن بنانے کے لیے بہت کوششیں کر رہے ہیں، پولیس والے بھی سیلاب کی وجہ سے شہید ہوئے۔
انہوں نے تجویز دیتے ہوئے کہا کہ جہاں ہمارے گلیئشرز ہیں وہاں پیشگی وارننگ سسٹم لگانے کی ضرورت ہے، تاکہ وقت سے پہلے پتا چلے کہ کیا ہونے والا ہے۔
پروگرام میں گفتگو کے دوران وفاقی وزیر نے کہا کہ ہم ایک گرین یونیورسٹی بنا رہے ہیں۔
