اسلام آباد:
وزیراعظم شہباز شریف نے کہا ہے کہ چھوٹے کسانوں کے لیے آسان قرض اور جدید زرعی سہولیات کی فراہمی ترجیح بنائی جائے۔
ملکی زرعی ترقی کے لیے منصوبہ بندی اور ایگری فنانسنگ پر جائزہ اجلاس وزیراعظم شہباز شریف کی زیرصدارت ہوا، جس میں وزیراعظم نے ہدایت کی ک ہدرمیانے اور چھوٹے پیمانے کی زرعی سرگرمیوں کے لیے آسان شرائط پر قرض کی فراہمی کے حوالے سے لائحہ عمل پیش کیا جائے۔
انہوں نے کہا کہ 12 ایکڑ سے کم زمین والے کسانوں کو جدید زرعی سہولیات کی فراہمی اولین ترجیح ہونی چاہیے۔ پاکستان کی ترقی زرعی شعبے اور کسانوں کی پیداوار کی ویلیو ایڈیشن سے مشروط ہے۔
شہباز شریف کا کہنا تھا کہ پاکستان کے زرعی شعبے میں ترقی کے لیے چھوٹے کسانوں کو سہولیات کی فراہمی اولین ترجیحات میں شامل ہے۔ کسانوں کو جدید زرعی آلات، مصنوعی ذہانت اور معیاری بیج کے لیے آسان شرائط پر قرض کی فراہمی کے لیے لائحہ عمل پیش کیا جائے۔
انہوں نے کہا کہ کسانوں کی اجناس کی پراسیسنگ سے برآمدات کے قابل اشیا کی تیاری کے لیے چھوٹے پیمانے کی صنعتی مشینری تک رسائی کے حوالے سے بھی جامع منصوبہ بندی کی جائے۔ حکومت کسانوں کو جدید زرعی آلات، معیاری بیج کی فراہمی، مصنوعی ذہانت، پانی کے بہتر استعمال، آن فارم اسمال انڈسٹری اور دیگر سہولیات کے لیے اصلاحات کے عمل کو تیز کر رہی ہے۔
وزیراعظم کا کہنا تھا کہ زرعی اجناس کی پراسیسنگ سے برآمدات میں اضافے کے لیے کسانوں کو درکار سہولیات و تربیت کے لیے اقدامات کو بھی اصلاحات میں شامل کیا جا رہا ہے۔
اجلاس میں نائب وزیرِ اعظم و وزیرِ خارجہ اسحاق ڈار، وفاقی وزرا احد خان چیمہ، رانا تنویر حسین، مشیر وزیرِ اعظم محمد علی، وزرا مملکت بلال اظہر کیانی، عبدالرحمن کانجو، معاون خصوصی ہارون اختر، گورنر اسٹیٹ بینک جمیل احمد، چیف کوآرڈینیٹر مشرف زیدی اور متعلقہ اعلیٰ حکام نے شرکت کی۔
اجلاس کو زرعی شعبے کی جاری اصلاحات کے ساتھ ساتھ زرعی ترقیاتی بینک لمیٹڈ کی کارکردگی اور کسانوں کو دیے جانے والے قرضوں کے حوالے سے تفصیلی بریفنگ دی گئی جب کہ وزیراعظم نے رواں ماہ کے اختتام تک کسانوں کو آسان شرائط پر قرضوں کی فراہمی اور ایگری فنانسنگ کے شعبے میں عصری تقاضوں سے ہم آہنگ نظام متعارف کروانے کے لیے جامع منصوبہ بندی تشکیل دے کر پیش کرنے کی ہدایت کی۔
