کراچی (اسٹاف رپورٹر) سابق انگلش کپتان مائیکل وان نےلارڈز کے تیسرے ٹیسٹ میں انگلینڈ کو سلو اوور ریٹ پر جرمانہ کرنے پر آئی سی سی کے فیصلے پر تشویش کا اظہار کیا ہےا نگلینڈ کے آئی سی سی ورلڈ ٹیسٹ چیمپئن شپ کے دو پوائنٹس میں کمی ہوئی ہے اور ان پر میچ فیس کا 10 فیصد جرمانہ عائد کیا گیا ہے۔ آئی سی سی کے مطابق انگلینڈ نے مقررہ وقت میں دو اوور کم کرائے ہیں ۔ پوائنٹس کٹوتی کے بعد ٹیم رینکنگ میں دوسرے سے تیسرے نمبر پر چلی گئی ہے جبکہ سری لنکا کی ٹیم دوسرے نمبر پر آگئی ہے۔ اپنے کالم میں مائیکل وان نے لکھا کہ لارڈز میں دونوں ٹیموں کے اوور ریٹ ناقص تھے، صرف ایک ٹیم کو کس طرح ملامت کی گئی یہ میری سمجھ سے باہر ہے۔ واضح رہے کہ آئی سی سی نے بدھ کو انگلینڈ کو بھارت کے خلاف تیسرے ٹیسٹ میچ میں سنسنی خیز فتح کے بعد سلو اوور ریٹ برقرار رکھنے پر جرمانہ کیا تھا۔
