پی ٹی آئی کے ناراض رکن قومی اسمبلی شیر افضل مروت نے کہا کہ اگر علیمہ خان تحریک نہیں چلاسکتیں تو مجھے موقع دیں۔ علیمہ خان نے پشتونوں کے بچوں کو تحریک کا کہا جبکہ اپنے بچوں کو برطانیہ بھیجا۔
لندن میں میڈیا سے گفتگو کرتے ہوئے شیر افضل نے کہا یہ کہاں کا انصاف ہے اپنے بچے برطانیہ چلے جائیں، دوسروں کے بچے تحریک چلائیں۔
انھوں نے کہا بانی پی ٹی آئی کے بچے پاکستان نہیں جائیں گے وہ ایک شوشہ چھوڑا گیا ہے، علیمہ خان نے پوری پی ٹی آئی قیادت کی بے عزتی کرائی، خود تحریک کی قیادت کریں۔
شیر افضل مروت نے کہا علیمہ خان کے پاس بہترین موقع ہے کہ وہ خود تحریک چلائیں، علیمہ خان لیڈرشپ کی صلاحیتوں کو بروئے کار لائیں، سلیمان اکرم راجہ نے جو عالیہ حمزہ کے خلاف زبان استعمال کی اسکی مذمت کرتا ہوں۔ ماضی میں بھی سلیمان اکرم راجہ بیرسٹر گوہر پر حملہ کر چکے ہیں، سلیمان اکرم راجہ اپنے آپ کو کلاس کا مانیٹر سمجھتے ہیں اور باقی طالب علم ہیں۔
انھوں نے کہا کہ علیمہ خان ورکرز اور لیڈرز کو تنگ کرکے پریشر میں لاتی ہیں، پی ٹی آئی کور کمیٹی، پارلمیانی کمیٹی کا اجلاس گالیوں سے شروع ہوکر گالیوں پر ختم ہوتا ہے۔
شیر افضل مروت نے کہا مجھے بانی پی ٹی آئی سے دور کرنے میں علیمہ خان، سلیمان اکرم، شبلی فراز کا کردار ہے، خواہش ہے علیمہ خان، انکے بچے بانی پی ٹی کی رہائی کی تحریک کو لیڈ کریں۔
