واشنگٹن:
امریکی صدر ڈونلڈ ٹرمپ نے میڈیا سے گفتگو کرتے ہوئے کہا کہ ٹیرف کی ادائیگیاں یکم اگست سے شروع ہوں گی اور اس اقدام کو امریکی معیشت کے استحکام کی جانب ایک اہم قدم قرار دیا۔
بین الاقوامی امور پر بات کرتے ہوئے صدر ٹرمپ نے دعویٰ کیا کہ ان کے دورِ صدارت میں کئی جنگوں کو روکا گیا، جس کے نتیجے میں لاکھوں انسانی جانیں بچائی گئیں۔
انہوں نے کہا کہ روسی یوکرین جنگ صدر بائیڈن کے دور میں شروع ہوئی، جبکہ ان کے دور میں روس نے کسی جارحیت کا آغاز نہیں کیا۔
صدر ٹرمپ نے مزید کہا کہ انہوں نے پاکستان اور بھارت کے درمیان ممکنہ جنگ کو بھی روکا اور دونوں ممالک کے درمیان کشیدگی کم کرنے میں کلیدی کردار ادا کیا۔
انہوں نے سابق صدر جو بائیڈن کی کمزور پالیسیوں کو عالمی سطح پر جنگوں اور تنازعات کی اصل وجہ قرار دیا اور کہا کہ ان کی حکومت نے ان غلطیوں کو درست کیا۔
ان کا کہنا تھا کہ ایران کی جوہری تنصیبات کو مکمل طور پر تباہ کر دیا گیا ہے تاکہ عالمی امن کو یقینی بنایا جا سکے۔
صدر ٹرمپ نے افریقہ میں قیام امن سے متعلق بات کرتے ہوئے کہا کہ انہوں نے روانڈا اور کانگو کے درمیان طویل عرصے سے جاری جنگ کو ختم کرایا۔
روس سے متعلق بات کرتے ہوئے انہوں نے کہا کہ صدر ولادیمیر پیوٹن نے امن کے لیے جو دعوے کیے تھے، ان پر عملدرآمد نہیں کیا گیا۔ تاہم ٹرمپ نے امید ظاہر کی کہ پیوٹن 50 دن میں اپنی رائے تبدیل کر لیں گے۔
ایران کے ساتھ مذاکرات کے حوالے سے صدر ٹرمپ کا کہنا تھا کہ انہیں بات چیت کرنے میں کوئی جلدی نہیں ہے، اور تمام فیصلے امریکہ کے مفاد کو مدنظر رکھتے ہوئے کیے جائیں گے۔
علاوہ ازیں انہوں نے بتایا کہ ویتنام کے ساتھ ایک اچھی تجارتی ڈیل طے پا گئی ہے جس سے دونوں ممالک کو معاشی فائدہ پہنچے گا۔
