لاہور اور گردونواح میں وقفے وقفے سے بارش کا سلسلہ جاری ہے، سب سے زیادہ بارش تاجپورہ میں 87 ملی میٹر ریکارڈ کی گئی۔
واسا حکام کے مطابق لکشمی چوک میں 81، قرطبہ چوک میں 70 ملی میٹر بارش ریکارڈ کی گئی جبکہ نشتر ٹاؤن میں 68، گلبرگ میں 63 ملی میٹر بارش ریکارڈ کی گئی۔
دوسری جانب پنجاب کے بیشتر اضلاع میں بھی موسلا دھار بارش کا سلسلہ وقفے وقفے سے جاری ہے ، جہاں ایک جانب بارشوں سے حبس میں کمی ہوئی ہے وہیں پنجاب کے مختلف علاقوں میں 24 گھنٹوں کے دوران آندھی اور بارش سے مختلف حادثات میں 11 افرادجاں بحق اور 92 زخمی ہوگئے۔
محکمہ موسمیات کے مطابق 17جولائی تک ملک کے کئی مقامات پر شدید بارشوں کا امکان ہے۔
لاہور کے ساتھ ساتھ قصور، چیچہ وطنی، اوکاڑہ اور پاکپتن، شیخوپورہ سمیت پنجاب کے دیگر کئی شہروں میں بھی گرج چمک کے ساتھ بارش کا سلسلہ جاری ہے، جس سے نشیبی علاقوں میں پانی کھڑا ہو گیا۔
شدید بارشوں کے باعث پاکپتن، قصور سمیت دیگر شہروں میں سڑکیں اور گلیاں دریا کا منظر پیش کرنے لگے، گاڑیاں اور موٹر سائیکلیں ڈوب گئیں، پاکپتن میں بارش کا پانی دکانوں میں داخل ہو گیا معمولات زندگی شدید متاثر ہیں۔
پی ڈی ایم اے ترجمان کے مطابق لاہور، راولپنڈی، فیصل آباد، ملتان، ساہیوال، بہاولپور، جہلم اور سیالکوٹ سمیت دیگر شہروں میں آندھی اورموسلا دھار بارشوں کا امکان ہے، جن کے باعث ندی نالوں میں طغیانی کا خطرہ ہے۔
