شام کے دروز اکثریتی شہر سویدا میں دو روز سے جاری فسادات کے بعد شامی فوج نے دروز رہنماؤں کی منظوری سے شہر میں پوزیشن سنبھال لی ہے۔
شامی وزیر دفاع کی جانب سے جنگ بندی (سیز فائر) کا اعلان کیا گیا ہے، تاہم شہر کے مضافاتی علاقوں میں جھڑپیں بدستور جاری ہیں۔
شامی وزارت دفاع اور داخلہ نے شہریوں سے اپیل کی ہے کہ گھروں سے باہر نہ نکلیں۔ شہر بھر میں کرفیو نافذ کر دیا گیا ہے اور مزید فوجی کمک تعینات کی جا رہی ہے۔
شامی سرکاری میڈیا کا دعویٰ ہے کہ سویدا پر اسرائیلی حملے ہو رہے ہیں۔ اسرائیلی وزیراعظم اور وزیر دفاع نے اپنے بیان میں کہا ہے کہ شامی فوج اور اس کے ہتھیاروں کو نشانہ بنانے کے احکامات دے دیے گئے ہیں۔
اسرائیلی حکومت کے مطابق ان کا مقصد “شامی دروز برادری کو نقصان سے بچانا” اور شام سے ملحقہ سرحدی علاقوں کو “غیر فوجی زون” میں تبدیل کرنا ہے۔
نسلی فسادات میں اب تک 99 افراد جاں بحق ہو چکے ہیں، جن میں دو بچے اور ایک خاتون بھی شامل ہیں۔ ہلاک ہونے والے افراد میں اکثریت کا تعلق دروز فرقے سے ہے۔
عرب میڈیا کے مطابق جھڑپوں کا آغاز ایک مسلح راہ زنی کے واقعے سے ہوا، جو بعد میں دروز اور بدو قبائل کے درمیان نسلی تصادم میں تبدیل ہو گیا۔ کشیدگی کے باعث شہریوں میں شدید خوف و ہراس پایا جاتا ہے۔
