نیشنل سائبر کرائم انویسٹی گیشن ایجنسی (NCCIA) لاہور زون نے سوشل میڈیا پر ریاست مخالف سرگرمیوں پر علیمہ خان کو تفتیش کیلیے طلب کرتے ہوئے نوٹس جاری کردیا۔
ایکسپریس نیوز کو نیشنل سائبر کرائم انویسٹی گیشن ایجنسی کے ذرائع نے بتایا کہ بانی پی ٹی آئی کی ہمشیرہ علیمہ خان کو 17 جولائی صبح 11 بج کر 30 منٹ پر NCCIA کے دفتر گلبرگ-II، لاہور میں ذاتی طور پر پیش ہونے کی ہدایت کی گئی ہے۔
ذرائع کے مطابق علیمہ خان کی طلبی کا مقصد ان سے ان کے دفاع میں بیان ریکارڈ کروانا ہے اور انہیں 27 مئی 2025 کو درج ہونے والے مقدمے کی انکوائری پر طلب کیا گیا ہے۔
ذرائع کے مطابق علیمہ خان پر الزام ہے کہ وہ سوشل میڈیا کے ذریعے ریاست مخالف سرگرمیوں میں ملوث رہی ہیں۔
این سی سی آئی اے نے نوٹس میں خبردار کیا ہے کہ ’’اگر ملزمہ پیش نہ ہوئیں تو یہ تصور کیا جائے گا کہ ان کے پاس اپنے دفاع میں کچھ پیش کرنے کو نہیں ہے اور عدم حاضری کی صورت میں قانونی کارروائی کو آگے بڑھایا جائے گا‘۔
نوٹس میں واضح کیا گیا ہے کہ طلبی پر عمل نہ کرنے کی صورت میں علیمہ خان کیخلاف دفعہ 174 کے تحت قانونی کارروائی کی جا سکتی ہے اور اس کی صورت میں انہیں گرفتار بھی کیا جاسکتا ہے۔
