وزارتِ صحت کے ذرائع کا کہنا ہے کہ خواتین میں سروائیکل کینسر کی شرح میں اضافے کے سبب حکومت نے انسدادِ سروائیکل کینسر کی ویکیسن متعارف کرانے کا فیصلہ کیا ہے۔
ذرائع کا کہنا ہے کہ 9 تا 14سال کی بچیوں کو ہیومن پیپی لوما وائرس ویکسین لگائی جائے گی، ویکسینیشن مہم 15 تا 27 ستمبر منعقد ہو گی۔
ایچ پی وی ویکسین فکسڈ سائٹ، کمیونٹی سینٹرز، موبائل یونٹس اور اسکولوں میں دستیاب ہوگی۔ اس کے علاوہ ایچ پی وی ویکسین روٹین ایمونائزیشن میں شامل کی جائے گی۔
ذرائع کے مطابق روٹین ایمونائزیشن میں 9 سال کی بچیوں کو ایچ پی وی ویکسین لگائی جائے گی۔ ایک کروڑ 80 لاکھ بچیوں کو ایچ پی وی ویکسین لگانے کا ہدف ہے۔
حکومت پاکستان کو ایچ پی وی ویکسین گاوی فراہم کرے گا۔ نجی شعبے میں ایچ پی وی ویکسین 4 تا 7 ہزار روپے میں دستیاب ہے۔
