اسلام آباد:
ملک میں گزشتہ مالی سال 2024-25کے پہلے گیارہ ماہ (جولائی تا مئی) کے دوران بڑی صنعتوں کی پیداوار میں 1.21 فیصد کمی ہوئی ہے جبکہ اپریل کے مقابلے مئی 2025 کے دوران پیداوارمیں7.39 فیصد اضافہ ہوا۔
تفصیلات کے مطابق وفاقی ادارہ شماریات نے بڑی صنعتوں کی پیداوار سے متعلق اعدادوشمار جاری کردیے ہیں۔ جاری رپورٹ میں بتایا گیا ہے کہ گزشتہ مئی 2025 میں سالانہ بنیادوں پر پیداوار میں 2.29 فیصد اضافہ ہوا ۔
جولائی 2024 تا مئی2025 فرنیچر شعبے کی پیداوار 58.09 فیصد کم ہوئی۔ جولائی2024 تا مئی2025 شوگر سیکٹر کی پیداوار میں 14.30 فیصد کمی رپورٹ ہوئی۔
اسی عرصے میں مشینری وآلات کی پیداوار میں 35.41 فیصد کمی ہوئی، فیبریکیٹڈ مٹیریل کی پیداوار 15.30 فیصد کم ہوئی ہے۔
ادارہ شماریات نے بتایا کہ الیکٹریکل آلات کی پیداوار 11 ماہ میں 12.74 فیصد کم ہوئی، فوڈ شعبے کی پیداوارمیں 2.32 فیصد کمی واقع ہوئی اس کے علاوہ کیمیکل شعبے کی پیداوار میں 4.06 فیصد کمی ریکارڈ ہوئی۔
