لاہور:
لاہور ایئرپورٹ پر طیاروں کو پرندوں سے ٹکرانے کے بڑھتے ہوئے خطرات کے پیش نظر وزیر اعلیٰ پنجاب مریم نواز شریف کی ہدایت پر اہم اور مربوط اقدامات کا آغاز کر دیا گیا ہے۔
وائلڈ لائف رینجرز پنجاب، ادارہ تحفظ ماحولیات، میونسپل کارپوریشن اور ایل ڈبلیو ایم سی سمیت متعدد محکمے فضائی حادثات کی روک تھام کے لیے مشترکہ کارروائیوں میں مصروف ہیں۔
ایڈیشنل ڈائریکٹر جنرل وائلڈ لائف رینجرز پنجاب، سید کامران بخاری نے ایکسپریس نیوز سے گفتگو کرتے ہوئے بتایا کہ لاہور ایئرپورٹ کے اطراف آٹھ کلو میٹر کے دائرے کو ’’نو برڈ زون‘‘ قرار دیا گیا ہے۔ ان کے بقول، اس زون میں پرندوں کی افزائش اور موجودگی محدود کرنے کے لیے ہنگامی بنیادوں پر کارروائیاں کی جا رہی ہیں۔
وائلڈ لائف رینجرز نے نو برڈ زون کے اندر مخصوص مقامات پر چیلوں کے گھونسلوں کی نشاندہی مکمل کر لی ہے۔ روزانہ کی بنیاد پر دو سے تین مقامات پر گھونسلے تلف کیے جا رہے ہیں، جبکہ موبائل ٹاورز اور بجلی کے کھمبوں پر بنے گھونسلوں کو ختم کرنے کے لیے ریسکیو 1122 کی مدد حاصل کی جا رہی ہے۔
فضا میں پرندوں کی موجودگی کو کم کرنے کے لیے دیگر ذرائع پر بھی توجہ دی جا رہی ہے۔ چیل گوشت فروخت کرنے والوں کے خلاف میونسپل کارپوریشن اور ایل ڈبلیو ایم سی کے عملے نے کارروائیاں تیز کر دی ہیں۔ لاہور کینال روڈ، سگیاں پل اور راوی پل جیسے حساس مقامات پر متعدد غیرقانونی گوشت فروشوں کو ہٹایا جا چکا ہے۔
ادارہ تحفظ ماحولیات نے ان افراد کے خلاف بھی ایکشن لینے کا آغاز کیا ہے جنہوں نے نو برڈ زون کے اندر اپنی چھتوں پر جنگلی کبوتر پال رکھے ہیں۔ اس ضمن میں گھروں کی چھتوں سے کبوتروں کے جال اور پنجرے ہٹانے کی مہم شروع کر دی گئی ہے۔
ماہرین کے مطابق، پرندوں سے ٹکرانے کے واقعات نہ صرف طیاروں کے لیے خطرناک ہیں بلکہ شہری فضائی سفر کی حفاظت کے لیے ایک سنگین چیلنج بنتے جا رہے ہیں۔ حکومت پنجاب کے ان حالیہ اقدامات کو ماحولیاتی نظم، شہری بیداری اور ہوابازی کے عالمی معیار کے مطابق قرار دیا جا رہا ہے۔
