بھارت کے سابق کپتان سنیل گواسکر نے ڈی آر ایس ٹیکنالوجی پر سوالات اٹھا دیے۔
لارڈز میں بھارت اور انگلینڈ کے درمیان ہونے والے تیسرے ٹیسٹ کے آخری دن کا آغاز مہمان ٹیم کے لیے بدترین انداز میں ہوا۔
بھارت نے 193 کے تعاقب میں اپنی دوسری اننگز کا آغاز 58 رنز 4 کھلاڑی آؤٹ پر کیا۔ میچ کے آخری روز اننگز کے دوبارہ آغاز پر جلد ہی رشبھ پنت، کے ایل راہول اور واشنگٹن سندر آؤٹ ہوگئے اور بھارت صرف 82 رنز پر 7 وکٹوں کا نقصان ہونے پر مشکل میں پھنس گیا۔
رشبھ پنت کو جوفرا آرچر نے شاندار گیند پر آؤٹ کیا اور واشنگٹن سندر بھی اسی انگلش بولر کے ہاتھوں آؤٹ ہوئے لیکن کے ایل راہول کے ایل بی ڈبلیو ہونے پر ایک بڑی بحث چھڑ گئی۔
ابتداء میں کے ایل راہول کو ناٹ آؤٹ قرار دیا گیا لیکن بین اسٹوکس نے ایل بی ڈبلیو کے اپیل کی تو ڈی آر ایس ریویو کے بعد کے ایل راہول کو 39 رنز پر آؤٹ قرار دے دیا گیا۔
تاہم سابق کرکٹر سنیل گواسکر نے کرکٹ میچ کے دوران فیصلہ سازی کا جائزہ لینے کے نظام (ڈی آر ایس) پر سوالات اٹھا دیے۔
انہوں نے کہا کہ حیرت انگیز طور پر یہ گیند اتنی نہیں اچھلی۔ جب بھارتی بولرز گیند کر رہے تھے تو زیادہ تر گیندیں ریویو میں اسٹمپس کے اوپر سے جا رہی تھیں، میں اس ٹیکنالوجی کے بارے میں سوال کر رہا ہوں۔
واضح رہے کہ سابق بھارتی کرکٹر نے ڈی آر ایس ٹیکنالوجی پر پہلی بار تنقید نہیں کی بلکہ اس سے قبل میچ کے چوتھے روز ریویو کے بعد جو روٹ کو ناٹ آؤٹ قرار دینے پر بھی اُنہوں نے اس ٹیکنالوجی کو تنقید کا نشانہ بنایا تھا۔
واضح رہے لارڈز ٹیسٹ کے پانچویں روز سنسنی خیز مقابلے کے بعد انگلینڈ نے بھارت کو 22 رنز سے شکست دے کر سیریز میں1-2 کی برتری حاصل کرلی ہے۔
