سپریم کورٹ نے بغیر مناسب مہلت دیے ایف بی آر کا ریکوری نوٹس جاری کرنا غیر قانونی قرار دے دیا۔
جسٹس عائشہ ملک نے تحریر کردہ 18 صفحات کا فیصلہ جاری کردیا، جسٹس منیب اختر کی سربراہی میں تین رکنی بینچ نے کیس کی سماعت کی تھی۔
سپریم کورٹ نے کہا کہ کمشنر انکم ٹیکس کا ایک ہی دن میں اپیل فیصلہ اور ریکوری نوٹس جاری کرنا انصاف کے اصولوں کے خلاف ہے، سپریم کورٹ نے ایف بی آر کی انٹرا کورٹ اپیلیں خارج کر دیں۔
سپریم کورٹ نے نجی کمپنی کے خلاف 2.92 ارب روپے کا انکم ٹیکس ریکوری نوٹس معطل کردیا اوردوسری نجی کمپنی پر 1.88 ارب روپے کی ودہولڈنگ ٹیکس وصولی کی کارروائی بھی کالعدم قرار دے دی۔
دونوں کمپنیوں کے خلاف ریکوری نوٹسز ٹیکس افسر نے اپیل کے دن ہی جاری کیے تھے، سپریم کورٹ نے ہائی کورٹ کے سنگل جج کا فیصلہ برقرار رکھتے ہوئے نوٹسز کو غیر قانونی قرار دیا اور کہا کہ سیکشن 140 کے تحت بینکوں کو فوری ادائیگی کے نوٹس دینا قانون کی منشا کے خلاف ہے، ریکوری سے قبل ٹیکس افسر کا اپیل کا فیصلہ باقاعدہ ٹیکس گزار کو موصول ہونا چاہیے۔
سپریم کورٹ نے کہا کہ قانون مطابق “by the date” کا مطلب ہے “مناسب وقت دیا جائے” نہ کہ “اسی دن” ادائیگی کی شرط ہے، ریکوری سے پہلے قانونی حقوق، شنوائی اور وقار کا تحفظ ضروری ہے، کمشنر ان لینڈ ریونیو کا رویہ اختیارات کے آمرانہ استعمال کے مترادف ہے۔
جسٹس عائشہ ملک نے کہا کہ جس سے بنیادی حقوق جیسے وقار، منصفانہ ٹرائل اور رسائی انصاف متاثر ہوئی۔
سپریم کورٹ نے قرار دیا کہ کمپنیوں سے فوری رقم نکلوانے کا عمل کاروباری شہرت کو نقصان پہنچانے کے مترادف ہے، ایف بی آر اپنا مؤقف ثابت کرنے میں ناکام رہی، نوٹس جاری کرنے اور رقوم نکالنے کا عمل خلاف قانون ہے، ٹیکس ریکوری اور شہری حقوق کے درمیان توازن قائم رکھنا لازم ہے۔
