بانیٔ پی ٹی آئی کی بڑی بہن روبینہ خان نے تحریکِ انصاف کے رہنما ذلفی بخاری پر ایک بار پھر الزامات عائد کیے ہیں۔
جاری کیے گئے بیان میں انہوں نے کہا ہے کہ اسٹیبلشمنٹ کی جانب سے ذلفی بخاری کو ایک متفقہ پی ٹی آئی لیڈر کے طور پر لانچ کیا جا رہا ہے، کئی مہینے منظر سے غائب رہنے کے بعد کیا یہ دھوکے باز آدمی اب وژن فراہم کرے گا؟
روبینہ خان کا کہنا ہے کہ ذلفی بخاری نے سیاحت اور پارٹی ترجمانی کے دوران کوئی کارکردگی نہیں دکھائی، یہ بین الاقوامی مشیر کے طور پرگِھسے پٹے بیانات دیتا تھا جن میں کوئی ٹھوس بات نہیں ہوتی۔
انہوں نے کہا کہ ذلفی بخاری انسانی حقوق کیس میں ناکام ہوا، فیصلے کے بعد کوئی سفارتی حکمتِ عملی نہ بنائی، ہر شخص کو یہ سوال اٹھانا چاہیے کہ یہ اصل میں کس کے لیے کام کر رہا ہے۔
روبینہ خان نے الزام عائد کیا کہ یہ بات طے ہے کہ وہ بانیٔ پی ٹی آئی کے لیے کام نہیں کر رہا، میں نے پوچھا کہ برطانیہ میں پاکستان میں انسانی حقوق کے خلاف ورزیوں پر زیادہ کوریج کیوں نہ حاصل کر سکے؟
انہوں نے یہ بھی کہا کہ ذلفی نے کہا کہ برطانیہ میں بانیٔ پی ٹی آئی میں کوئی دلچسپی نہیں ہے، یہ 2023ء کی بات ہے۔
دوسری جانب ذلفی ذلفی بخاری کے قریبی ذرائع نے روبینہ خان کے الزامات کو بے بنیاد قرار دے کرمسترد کردیا۔
واضح رہے کہ روبینہ خان اس سے قبل بھی ذلفی بخاری پر مختلف الزامات عائد کر چکی ہیں۔
