انڈونیشیا کے وزیر دفاع نے وفد کے ہمراہ منگل کو جی ایچ کیو کا دورہ کیا اور فیلڈ مارشل عاصم منیر سے ملاقات کی۔
مسلح افواج کے شعبہ تعلقات عامہ (آئی ایس پی آر) کے مطابق انڈونیشیا کے وفد میں مختلف سروسز اور انٹیلیجنس ایجنسیوں کے نمائندے شامل تھے۔
انڈونیشیا کے وفد نے آرمی چیف فیلڈ مارشل عاصم منیر سےملاقات کی۔ اس موقع پر دونوں ممالک کے درمیان دو طرفہ دفاعی تعاون پر تبادلہ خیال کیا گیا۔
ملاقات میں علاقائی سلامتی کی صورتحال اور عسکری تعلقات کو مزید مضبوط بنانے کے امکانات پر بھی بات چیت کی گئی۔
آئی ایس پی آر کے مطابق ملاقات میں پاکستان اور انڈونیشیا کے درمیان دیرینہ دوستی اور تعاون پر زور دیا گیا۔
اس موقع پر فیلڈ مارشل عاصم منیر نے خطے میں امن و استحکام کیلئے باہمی تعاون کی اہمیت پر روشنی ڈالی۔
آئی ایس پی آر کے مطابق انڈونیشیا کے وزیر دفاع نے دہشتگردی کے خلاف جنگ میں پاک فوج کے کردار کو سراہا اور پاکستان کے ساتھ دفاعی تعلقات کو مزید فروغ دینے کے عزم کا اعادہ کیا۔
