پنجاب اسمبلی میں اپوزیشن کے 26 معطل ارکان کے خلاف ریفرنس کے معاملے پر حکومت اور اپوزیشن کے درمیان گزشتہ روز ہونے والے مذاکرات کی اندرونی کہانی سامنے آگئی۔
ذرائع کا کہنا ہے کہ اپوزیشن اور حکومت کے درمیان مذاکرات میں بیشتر نکات پر اتفاق رائے ہوگیا ہے، دونوں کی کمیٹی میں اتفاق ہوا کہ اسمبلی اجلاس کو پارلیمانی روایات کے مطابق ہی چلایا جائے گا۔
اجلاس کے دوران اپوزیشن کے سامنےحکومتی کمیٹی نے تین شرائط رکھیں۔
حکومتی کمیٹی نے اپنی شرائط میں کہا کہ اسمبلی میں گالم گلوچ، غیر پارلیمانی الفاظ کا استعمال نہیں کیا جائے۔ وزیر اعلیٰ اور وزراء کی تقریر کے دوران ہلڑ بازی کی بجائے بات سنی جائے۔ ایوان کو پارلیمانی روایات کے تحت چلایا جائے۔
ذرائع کے مطابق حکومتی اراکین نے کہا کہ اپوزیشن گارنٹی دے ان پر عملدرآمد ہوگا، اپوزیشن مذاکراتی کمیٹی نے بھی 4 مطالبات حکومتی ارکان، اسپیکر کے سامنے رکھے۔
اپوزیشن مذاکراتی کمیٹی نے اپنے ارکان کےخلاف ریفرنس واپس لینے کا مطالبہ کرتے ہوئے کہا کہ اپوزیشن کے معطل ارکان کو بحال کیا جائے، اپوزیشن ارکان پر جرمانے ختم کیے جائیں، اپوزیشن کے 4 ارکان کو دوبارہ قائمہ کمیٹیوں کا چیئرمین بنایا جائے۔
ذرائع کے مطابق اپوزیشن مذاکراتی کمیٹی نے کہا کہ احتجاج شور شرابا اپوزیشن کا استحقاق ہے۔
