یوکرین کے دارالحکومت کیف میں دن دہاڑے ایک سینئر خفیہ افسر کو گولیاں مار کر قتل کر دیا گیا، حکام کے مطابق حملہ آور موقع سے فرار ہو گیا جبکہ واقعے کی تحقیقات جاری ہیں۔
سیکیورٹی سروس آف یوکرین سے تعلق رکھنے والے افسر کو ایک پارکنگ ایریا میں گولیوں کا نشانہ بنایا گیا، سوشل میڈیا پر گردش کرتی سی سی ٹی وی ویڈیو میں دیکھا جا سکتا ہے کہ حملہ آور نے اچانک آ کر افسر پر کئی گولیاں چلائیں اور موقع سے فرار ہوگیا۔
اگرچہ SBU نے مقتول کی شناخت ظاہر نہیں کی، لیکن یوکرینی میڈیا نے انہیں کرنل ایوان ورونووچ کے نام سے شناخت کیا ہے۔
کیف پولیس کا کہنا ہے کہ جائے وقوعہ پر پہنچنے پر ایک شخص کی لاش ملی جس پر گولیوں کے نشانات تھے، پولیس کا کہنا ہے کہ حملہ آور کی شناخت اور گرفتاری کے لیے اقدامات جاری ہیں۔
خبر رساں ادارے رائٹرز نے سی سی ٹی وی ویڈیو کی تصدیق کی ہے جس میں ایک شخص کو صبح 09:00 بجے کے قریب (مقامی وقت) ہولوسیوفسکی ضلع میں ایک عمارت سے نکلتے ہوئے دیکھا جا سکتا ہے۔
اس کے ہاتھ میں ایک پلاسٹک بیگ اور ایک سادہ بیگ ہے، جبکہ اسی وقت ایک دوسرا شخص اچانک دوڑتا ہوا اس کی طرف آتا ہے۔
واضح رہے کہ SBU کا کام برطنیہ کی ایم آئی فائیو کی طرح اندرونی سلامتی اور انسدادِ جاسوسی پر مبنی ہوتا ہے۔
