اسلام آباد:
وزیر مملکت برائے داخلہ طلال چوہدری نے کہا ہے کہ اگر پاکستان تحریک انصاف (پی ٹی آئی) کے بانی کے بچے پاکستانی شہری نہیں ہیں تو انہیں ویزہ لے کر آنا پڑے گا اور بلوچستان میں حالیہ دہشت گردی آپریشن سندور کا تسلسل ہے۔
پارلیمنٹ ہاؤس میں میڈیا کے سوالوں کے جواب دیتے ہوئے وزیرمملکت برائے داخلہ طلال چوہدری نے کہا کہ بانی پی ٹی آئی کے بچے اگرپاکستانی شہری نہیں ہیں تو ویزے کی پابندیاں لاگو ہوں گی اور کسی ملکی و غیرملکی کو پاکستان میں آکرقانون ہاتھ میں لینے کی اجازت نہیں ہوگی۔
انہوں نے کہا کہ بلوچستان میں حالیہ دہشت گردی آپریشن سندور کا تسلسل ہے، بھارت پراکسیزکے ذریعے سافٹ ٹارگٹس کو نشانہ بنا رہا ہے لیکن بھارتی پراکسیز کو ختم کریں گے۔
طلال چوہدری نے کہا کہ پاکستان کے خلاف جتنی رقم لگا کر لابنگ پی ٹی آئی نے کروائی ہے کسی نے نہیں کروائی، ان کے پیسے ضائع گئے ہیں،گولڈ اسمتھ کا خاندان آج بھی بانی پی ٹی آئی کی سپورٹ کر رہا ہے۔
دہشت گردی کے واقعات پر بات کرتے ہوئے انہوں نے کہا کہ بلوچستان اور خیبرپختونخوا (کے پی) میں بھارت کی پراکسیز بےگناہ اور معصوم لوگوں کو ٹارگٹ کر رہی ہیں، بلوچستان میں حالیہ دہشت گردی کا واقعہ آپریشن سندور کا تسلسل ہے۔
انہوں نے کہا کہ بھارت اپنی پراکسیزکے ذریعے اب پاکستان میں آسان اہداف کو نشانہ بنا رہا ہے لیکن پاکستانی ادارے، پاکستانی عوام تیار ہیں اور دشمن کامقابلہ کریں گے۔
ان کا کہنا تھا کہ کے پی اور بلوچستان میں انسداد دہشت گردی کے اداروں کو مضبوط کرنے کی ضرورت ہے، بلوچستان میں دہشت گردی کے واقعات میں کافی کمی آئی ہے۔
طلال چوہدری نے کہا کہ کالعدم ٹی ٹی پی اور بی ایل اے دونوں ہمسایہ پراکسیز ہیں اور ہمسایہ ممالک میں بیٹھ کر پاکستان کے خلاف کام کر رہی ہیں۔
