بھارتی کرکٹ ٹیم کے سابق کپتان ویرات کوہلی نے ٹیسٹ کرکٹ سے ریٹائرمنٹ پر خاموشی توڑ دی۔
ویرات کوہلی نے ٹیسٹ کرکٹ سے ریٹائرمنٹ پر پہلی بار کھل کر بات کی ہے، انہوں نے اپنے خیالات کا اظہار یووراج سنگھ کی فلاحی تنظیم کے لیے لندن میں منعقدہ فنڈ ریزنگ ڈنر تقریب میں کیا جہاں دنیا بھر سے موجودہ اور سابق کرکٹ اسٹارز ایک چھت تلے جمع ہوئے۔
تقریب کے دوران جب میزبان نے کوہلی سے کہا کہ سب لوگ انہیں میدان میں یاد کر رہے ہیں، تو ویرات نے مسکراتے ہوئے کہا کہ میں نے دو دن پہلے اپنی داڑھی رنگی ہے اور جب ہر چار دن میں داڑھی رنگنی پڑے تو سمجھ لیں کہ وقت آ چکا ہے۔
ویرات کوہلی نے اپنے سابق کوچ روی شاستری کے ساتھ اپنے تعلقات پر روشنی ڈالتے ہوئے کہا کہ اگر میں روی بھائی کے ساتھ نہ ہوتا تو جو کچھ میں نے ٹیسٹ کرکٹ میں حاصل کیا وہ ممکن نہ ہوتا، ہم دونوں کے درمیان جو کلیئرٹی اور اعتماد تھا وہ کسی نعمت سے کم نہیں، انہوں نے ہمیشہ میرا دفاع کیا، یہاں تک کہ میڈیا میں بھی میرے لیے فرنٹ لائن پر کھڑے ہوئے، میں ہمیشہ ان کا احترام کروں گا۔
ویرات کوہلی نے یووراج سنگھ کے ساتھ اپنی پرانی یادیں تازہ کرتے ہوئے کہا کہ ہماری دوستی صرف میدان تک محدود نہیں تھی، میں نے ان سے بہت کچھ سیکھا، وہ مجھے ٹیم میں لے کر چلے، اعتماد دیا اور زندگی کے کئی پہلوؤں سے روشناس کرایا، یہ سب لمحے میرے دل کے بہت قریب ہیں۔
ویرات کوہلی کا دلچسپ انداز میں ریٹائرمنٹ پر تبصرہ اور اپنے پرانے ساتھیوں کے ساتھ محبت بھرا لہجہ مداحوں کے دلوں کو چھو گیا۔
یاد رہے کہ ویرات کوہلی نے 12 مئی کو انسٹاگرام پر ایک طویل پوسٹ میں ٹیسٹ کرکٹ سے ریٹائرمنٹ کا اعلان کیا تھا۔
