خیبر پختونخوا حکومت نے وفاق کو چینی کی خریداری میں صوبے کے عوام کے معیار سے آگاہ کردیا۔
صوبائی حکومت کے ذرائع کا کہنا ہے کہ خیبر پختونخوا میں عوام موٹے دانے والی چینی استعمال کرتے ہیں، چینی درآمد کرنے کےلیے اس معیار کو مدِنظر رکھا جائے۔
حکومتی ذرائع کا کہنا ہے کہ صوبے میں چینی کی قیمتوں کو کنٹرول کرنا حکومت کا کام ہے۔
کے پی حکومت نے وفاق سے مطالبہ کیا ہے کہ کراچی پورٹ پہنچنے پر چینی کی قیمت 160 روپے فی کلو ہونی چاہیے، اس نرخ سے زیادہ قیمت ہونے پر کے پی میں چینی کی قیمتوں میں اضافے کا خدشہ ہے۔
حکومتی ذرائع کے مطابق خیبر پختونخوا میں چینی کا 1 لاکھ 91 ہزار ٹن ذخیرہ موجود ہے، صوبے میں چینی کا موجودہ ذخیرہ 71 دنوں کے لیے کافی ہے۔
اس حوالے سے چیف سیکریٹری خیبر پختونخوا شہاب علی شاہ کا کہنا ہے کہ صوبے بھر میں چینی کی قیمت کی مانٹیرنگ کر رہے ہیں، ضلعی انتظامیہ کو ذخیرہ اندوزی کرنے والوں کے خلاف سخت کارروائی کی ہدایت کی ہے۔
