کراچی (اسٹاف رپورٹر) پاکستانی کرکٹ ٹیم کے دورہ بنگلہ دیش سے قبل فاسٹ بولر حارث رؤف انجری کے باعث امریکا کی میجر لیگ کرکٹ سے باہر ہو گئے ہیں۔ انجری کے باعث حارث رؤف کی رواں ماہ بنگلادیش کے خلاف سیریز میں شرکت خطرے میں پڑ گئی ہے۔ جبکہ ویسٹ انڈیز کے دورے میں ان کی شمولیت فٹنس سے مشروط ہے۔ سوشل میڈیا پرامریکا کی میجر لیگ کرکٹ میں ٹیم سان فرانسسکو یونیکارنز نے تصدیق کی ہے کہ حارث رؤف ہیم اسٹرنگ انجری کا شکار ہو کرمیجر لیگ کرکٹ کے بقیہ میچز نہیں کھیل سکیں گے۔ ان کی جگہ نیوزی لینڈ کے بین لسٹر کو فوری بطور متبادل ٹیم میں شامل کر لیا گیا ہے۔
