انڈونیشیا کا آتش فشاں ماؤنٹ لیووٹوبی لاکی لاکی پھٹ پرا، جس سے راکھ اور گرم گیسز کا طوفان 18 کلو میٹر (11 میل) آسمان کی بلندی تک پہنچ گیا اور قریبی دیہات پر راکھ کی تہیں جم گئیں۔
انڈونیشیا کی ارضیاتی ایجنسی کے مطابق آتش فشاں گزشتہ ماہ سے اعلیٰ ترین الرٹ لیول پر ہے اور تاحال کسی جانی نقصان کی اطلاع موصول نہیں ہوئی۔
ایجنسی نے بتایا کہ آتش فشاں پھٹ جانے کی وجہ سے آتش فشانی مواد، گرم گیس، چٹانیں اور لاوا پہاڑ کی ڈھلوانوں سے 5 کلومیٹر (3 میل) تک نیچے بہا۔
ارضیاتی ایجنسی کے سربراہ محمد وافد نے بتایا کہ یہ اخراج نومبر 2024ء کے بڑے دھماکے کے بعد سب سے شدید ہے، جس میں 9 افراد ہلاک اور درجنوں زخمی ہوئے تھے۔
انہوں نے کہا کہ اس سطح کا دھماکہ یقیناً ہوائی سفر سمیت دیگر خطرات میں اضافہ کرتا ہے، ہم جلد ہی دائرہ کار کو بڑھا کر دوبارہ جائزہ لیں گے۔
18 جون کو ہونے والے دھماکے کے بعد آتش فشاں کے ارد گرد کے خطرناک زون کا دائرہ 7 کلومیٹر (4.3 میل) تک بڑھایا گیا تھا۔
گزشتہ سال کے دھماکوں کے بعد 6 ہزار 500 افراد کو محفوظ مقامات پر منتقل کیا گیا تھا جبکہ جزیرے کا فرانس سیڈا ایئرپورٹ بند کر دیا گیا تھا، جو تاحال بند ہے۔
