روس کے صدر ولادیمیر پیوٹن نے امریکا کے ساتھ تعلقات میں بہتری کا کریڈٹ براہِ راست امریکی صدر ڈونلڈ ٹرمپ کو دے دیا ہے۔
غیر ملکی میڈیا رپورٹس کے مطابق، پیوٹن نے جمعہ کو پریس کانفرنس سے خطاب کرتے ہوئے کہا کہ ڈونلڈ ٹرمپ کی کوششوں کے باعث روس اور امریکا کے درمیان تعلقات میں بہتری کی سمت میں پیشرفت ہونا شروع ہوئی ہے۔
پیوٹن کا کہنا تھا کہ وہ صدر ٹرمپ کا احترام کرتے ہیں اور ان سے ملاقات کے خواہشمند ہیں۔
روسی صدر نے واضح کیا کہ اس ممکنہ ملاقات کےلیے محتاط اور جامع تیاری کی ضرورت ہوگی، تاہم انہوں نے امید ظاہر کی کہ مستقبل میں یہ ملاقات ہوسکتی ہے۔
پیوٹن نے مزید کہا کہ وہ صدر ٹرمپ کے شکر گزار ہیں جن کی کوششوں کی وجہ سے دونوں ممالک کے تعلقات کچھ پہلوؤں میں بہتری کی طرف گامزن ہوئے ہیں۔
صدر پیوٹن کا کہنا تھا کہ اگرچہ سفارتی سطح پر ابھی ہر بات پر اتفاق نہیں ہو پایا، لیکن اہم ابتدائی اقدامات کیے جاچکے ہیں اور اس سمت میں پیشرفت جاری ہے۔ انہوں نے اس امید کا اظہار کیا کہ روس اور امریکا کے تعلقات میں مزید بہتری کے لیے یہ مثبت اقدامات بنیاد فراہم کریں گے۔
