پنجاب میں 85 سالہ بزرگ پر ظلم کا انسانیت سوز واقعہ پیش آیا ، جس میں ملزمان نے بیرون ملک مقیم بیٹے کو لائیو کال پر اس کے باپ پر بہیمانہ تشدد دکھایا۔
بہاولپور کے علاقے تھانہ قائم پور کی حدود میں واقع چک 19 فورڈواہ میں ایک انسانیت سوز واقعہ پیش آیا ہے، جس میں آصف ڈان نامی بااثر شخص نے اپنے کارندوں کے ساتھ مل کر 85 سالہ بزرگ شہری پر بدترین تشدد کیا۔ واقعے کی ویڈیو بھی وائرل ہوگئی، جس پر عوامی حلقوں میں شدید غم و غصہ پایا جاتا ہے۔
پولیس کے مطابق متاثرہ بزرگ شہری حفیظ ساجد کو چک کے مرکزی چوک سے اسلحہ کے زور پر اغوا کیا گیا اور آصف ڈان کے ڈیرے پر لے جایا گیا، جہاں اسے زمین پر بٹھا کر بے دردی سے مارا پیٹا گیا اور جب بزرگ بے ہوش ہوا تو اسے دوبارہ ہوش میں لا کر تشدد کا نشانہ بنایا جاتا رہا۔
ملزمان نے ظلم کی حد کرتے ہوئے ملائیشیا میں مقیم بزرگ کے بیٹے کو ویڈیو کال کی اور اسے باپ پر ظلم و تشدد براہ راست دکھایا گیا۔ دورانِ تشدد ملزمان بار بار بیٹے کو کہتے رہے کہ اپنے باپ کو چھڑوا لو جب کہ بیٹا ویڈیو کال پر اپنے والد کی حالت دیکھ کر روتا اور گڑگڑاتا رہا، تاہم وہ بے بس رہا۔
پولیس حکام کے مطابق واقعے کی ویڈیو منظرعام پر آنے کے بعد پولیس نے فوری کارروائی کرتے ہوئے مقدمہ درج کیا اور مرکزی ملزم آصف ڈان سمیت دیگر افراد کو گرفتار کر لیا۔ مزید تفتیش جاری ہے اور متاثرہ خاندان کو مکمل تحفظ فراہم کیا جا رہا ہے۔
دوسری جانب متاثرہ بزرگ شہری حفیظ ساجد نے انصاف کے لیے دہائی دیتے ہوئے مطالبہ کیا ہے کہ انہیں اور ان کے خاندان کو مکمل انصاف فراہم کیا جائے اور ملزمان کو سخت ترین سزا دی جائے تاکہ آئندہ کوئی شخص اس قسم کی درندگی کا تصور بھی نہ کرے۔
