سرائے مغل کے نواحی علاقے سندھو کلاں میں اغواء کی ایک کوشش اس وقت ناکام بنا دی گئی جب مقامی شہریوں نے بہادری کا مظاہرہ کرتے ہوئے دو مسلح نوجوانوں کو پکڑ کر پولیس کے حوالے کر دیا۔
پولیس کے مطابق ایک نوجوان، جس کی منگنی چند روز قبل ختم ہوگئی تھی، لاہور سے پسٹل لے کر اپنے ایک دوست کے ہمراہ متاثرہ لڑکی کو اغواء کرنے کے ارادے سے سرائے مغل پہنچا۔ دونوں ملزمان گن پوائنٹ پر لڑکی کے گھر میں داخل ہوئے اور 18 سالہ لڑکی کو سر پر پسٹل تان کر موٹر سائیکل پر بٹھا لیا۔
ایف آئی آر کے مطابق ملزمان نے گھر والوں اور پاس آنے والوں کو جان سے مار دینے کی دھمکیاں دیں، لیکن گھر والوں کے شور مچانے پر اہل علاقہ جمع ہو گئے اور بروقت کارروائی کرتے ہوئے دونوں نوجوانوں کو قابو کر لیا۔ لڑکی کو بحفاظت بازیاب کروا کر دونوں ملزمان کو تھانہ سرائے مغل پولیس کے حوالے کر دیا گیا۔
پولیس نے مقدمہ درج کر کے قانونی کارروائی کا آغاز کر دیا ہے۔ پولیس کے مطابق ملزمان سے اسلحہ برآمد کر لیا گیا ہے اور مزید تفتیش جاری ہے۔
