یورپ بھجوانے کا جھانسا دے کر اغوا کرنے والے بین الاقوامی گروہ کے کارندوں کو گرفتار کرلیا گیا۔
ایکسپریس نیوز کے مطابق پولیس نے بڑی کارروائی کرتے ہوئے بین الاقوامی اغوا کار گروہ کے 3 اہم کارندوں کو گرفتار کر لیا ہے جو نوجوانوں کو یورپ لے جانے کا جھانسہ دے کر اغوا کرتے تھے۔
ڈی پی او نوشہرہ نے پریس کانفرنس میں انکشاف کیا کہ یہ گروہ سادہ لوح افراد کو اغوا کر کے بالکل کچے کے ڈاکوؤں کی طرز پر ورثا سے لاکھوں ڈالر تاوان وصول کرتا تھا۔
انہوں نے بتایا کہ گروہ کا نشانہ بننے والا تازہ ترین کیس ایک افغان شہری کا تھا، جسے یورپ بھجوانے کا جھانسا دے کر نوشہرہ کے علاقے جہانگیرہ سے اغوا کیا گیا، جس کے بعد پولیس نے بروقت کارروائی کرتے ہوئے کیس کو چند دنوں ہی میں ٹریس کر لیا اور 3 ملزمان کو گرفتار کر کے مغوی شخص کو بازیاب کرایا۔
گرفتار ملزمان کا تعلق ایک ایسے گروہ سے ہے جو بیرون ملک سے سرگرم ہے اور ماضی میں بھی متعدد نوجوانوں کو غیرقانونی طریقے سے بیرون ملک لے جانے کے بہانے اغوا کر چکا ہے۔
ڈی پی او نے بتایا کہ ملزمان کے خلاف ٹھوس شواہد موجود ہیں اور ان کے خلاف مقدمہ درج کر کے قانونی کارروائی شروع کر دی گئی ہے۔ انہوں نے نوشہرہ پولیس کی ٹیم کو بروقت کارروائی پر سراہا اور شہریوں سے اپیل کی کہ وہ اس قسم کے جعلساز گروہوں سے ہوشیار رہیں اور کسی بھی مشکوک سرگرمی کی فوری اطلاع پولیس کو دیں۔
