کراچی:
سائٹ ایریا میٹرووِل شہدا قبرستان سے 40 سالہ نامعلوم شخص کی کمبل میں لپٹی ہوئی لاش ملی ہے جسے نامعلوم ملزمان نے انتہائی بے دردی سے تشدد کا نشانہ بنانے کے بعد قتل کیا۔
تفصیلات کے مطابق پیر کی صبح سائٹ اے تھانے کے علاقے سائٹ ایریا میٹرووِل شہدا قبرستان سے ایک شخص کی کمبل میں لپٹی ہوئی لاش ملی ہے جسے نامعلوم ملزمان نے انتہائی بے دردی سے تشدد کا نشانہ بنانے کے بعد قتل کیا۔ اطلاع ملنے پر پولیس موقع پر پہنچ گئی اور جائے وقوع سے شواہد اکٹھا کرنے کرنے کے لیے کرائم سین یونٹ کو طلب کر لیا گیا۔
مقتول کی لاش قانونی کارروائی کے لیے ایدھی ایمبولینس کے ذریعے عباسی شہید اسپتال منتقل کی گئی۔ مقتول کی عمر 40 سال کے قریب ہے جبکہ مقتول کے پاس سے ایسی کوئی چیز برآمد نہیں ہوئی جس کی مدد سے اس کی شناخت ممکن ہو سکے۔
ایس ایچ او سائٹ اے عمران آفریدی نے بتایا کہ مقتول کی لاش 10 سے 12 گھنٹے پرانی معلوم ہوتی ہے، مقتول کو نامعلوم ملزمان نے انتہائی بے دردی سے تشدد کا نشانہ بنا کر قتل کیا ہے، پولیس نے لاش کا پوسٹ مارٹم کرنے کے لیے عباسی شہید اسپتال منتقل کیا ہے تاکہ وجہ موت کا حتمی تعین ہو سکے۔
انہوں نے بتایا کہ مقتول کی شناخت کی بھی کوشش کی جا رہی ہے، اندھے قتل کے واقعے کی مختلف پہلوؤں پر تفتیش کی جا رہی ہے۔
