ہانیہ عامر حج کی ادائیگی کے بعد سعودی عرب کے مختلف مقامات کی سیر کرنے لگیں۔
پاکستان کی معروف اداکارہ اور سوشل میڈیا کی سپر اسٹار ہانیہ عامر نے حال ہی میں اپنی والدہ کے ہمراہ فریضۂ حج ادا کیا ہے، حج کی ادائیگی کے بعد اب وہ سعودی عرب میں مختلف اہم مقامات کی زیارت اور سیر کر رہی ہیں۔
ہانیہ عامر اس وقت اپنی والدہ اور قریبی دوستوں کے ہمراہ مکہ مکرمہ میں موجود ہیں، جہاں وہ روحانی لمحات گزارنے کے ساتھ ساتھ مقامی ثقافت سے بھی لطف اندوز ہو رہی ہیں، اداکارہ نے سوشل میڈیا پر عبایہ پہنے اپنی خوبصورت تصاویر شیئر کی ہیں، جنہیں مداحوں کی جانب سے بےحد سراہا جا رہا ہے۔
اپنی تصاویر کے کیپشن میں ہانیہ نے خود کو پرنسز ان سعودیہ لکھا، اداکارہ نے معروف سعودی فاسٹ فوڈ چین البیک کا بھی ذائقہ چکھا اور دوستوں کے ساتھ تصاویر بھی شیئر کیں، جس میں وہ خوشگوار موڈ میں دکھائی دے رہی ہیں۔
مداحوں نے سوشل میڈیا پر ہانیہ عامر کو دعائیں دیتے ہوئے انہیں ’حجن ہانیہ عامر‘ کا لقب دیا۔
ایک مداح نے لکھا کہ آپ کی روزانہ کی تصاویر دل کو سکون دیتی ہیں جبکہ ایک اور نے کہا، ’حجن صاحبہ، آپ عبایہ میں بہت خوبصورت لگ رہی ہیں۔‘
یاد رہے کہ ہانیہ عامر پاکستان کی مقبول ترین فنکاراؤں میں شمار ہوتی ہیں، اور انسٹاگرام پر ان کے مداحوں کی تعداد 1 کروڑ 86 لاکھ سے تجاوز کر چکی ہے، ان کے مشہور ڈراموں میں مجھے پیار ہوا تھا، میرے ہمسفر، سنگِ ماہ، انا، دلربا اور دیگر شامل ہیں۔
