بھارتی ایئر لائن ایئر انڈیا کے احمد آباد میں گرکر تباہ ہونے والے طیارے کی ایک مسافر خاتون صرف 10 منٹ لیٹ ہونے کی وجہ سے طیارے میں سوار نہ ہوسکی اور بچ گئیں۔
اس حادثے کے بعد خوش قسمت خاتون نے میڈیا سے گفتگو کرتے ہوئے کہا کہ یہ سب ہونے کے بعد وہ کانپ گئی تھیں۔
بھومی چوہان نامی یہ خاتون جنھیں ایئر انڈیا کی فلائٹ AI-171 میں لندن جانا تھا تاہم دس منٹ تاخیر سے پہنچنے پر فلائٹ مس ہوگئی تھی اور اس وجہ سے وہ المناک حادثے میں محفوظ رہیں۔
بھارتی میڈیا کے مطابق وہ ٹریفک جام میں پھنس گئی تھیں جس کی وجہ سے بروقت ایئر پورٹ نہ پہنچ سکیں اور محفوظ رہیں۔
خاتون نے کہا کہ وہ اس افسوسناک حادثے کا سن کر شدید دکھ کی کیفیت میں ہیں اور یہ سب کچھ سوچ کر ہی میرا جسم کپکپا رہا ہے اور ذہن ماؤف ہوگیا ہے۔
واضح رہے کہ بھارتی شہر احمد آباد میں مسافر طیارہ گر کرتباہ ہوگیا جس کے نتیجے طیارے میں سوار 241 افراد ہلاک ہوگئے۔ ایک مسافر معجزانہ طور پر بچ گیا۔
