سندھ پولیس کی جانب سے شہر قائد میں نصب کیے گئے سیف سٹی کیمروں نے باقاعدہ کام کرنا شروع کردیا جس کی مدد سے جعلی نمبر پلیٹ لگی پہلی گاڑی پکڑی گئی
ایکسپریس نیوز کے مطابق سیف سٹی کیمرے کی مدد سے پاکستان چوک سے پیپلزاسکوائر جانے والی جعلی نمبر پلیٹ گاڑی سیف سٹی کیمرے میں محفوظ ہوئی۔
پولیس نے کارروائی کر کے جعلی نمبر بی ایل 2206 لگی گاڑی کو تحویل میں لے لیا۔
پولیس کے مطابق سیف سٹی کیمروں نے گاڑی پر لگی جعلی نمبر پلیٹ کی شناخت کی جسکے بعد چیکنگ پر موجود تھانہ آرام باغ پولیس موبائل کو اطلاع دی گئی۔
پولیس نے تعقب کرکے گاڑی کو روکا تو سیاہ رنگ کی گاڑی الطاف حسین ولد حاجی اللہ ڈینو نامی شخص چلا رہا تھا جبکہ گاڑی کے رجسٹریشن نمبر کو چیک کیا گیا تو نمبر فارچیونر گاڑی کی نام پر رجسٹرڈ پایا گیا۔
پولیس نے دھوکے سے دوسری گاڑی کا رجسٹریشن نمبر استعمال کرنے کے الزام میں گاڑی کے ڈرائیور کو گرفتار اور گاڑی تحویل میں لے لی ہے۔ جبکہ واقعہ کا مقدمہ آرام باغ تھانے میں دھوکہ دہی کی دفعات کے تحت درج کرلیا گیا ہے۔
