اسلام آباد:
وفاقی حکومت نے نئے مالی سال 26-2025 کے لیے ایک ہزار ارب روپے سے زائد مالیت کے پبلک سیکٹر ڈیولپمنٹ پروگرام اور سالانہ ترقیاتی منصوبے کی منظوری کے لیے سالانہ منصوبہ رابطہ کمیٹی(اے پی سی سی)کا اجلاس 2 جون کو طلب کر لیا۔
ایکسپریس نیو زکے مطابق اے پی سی سی کی منظوری کے بعد اسی ہفتے وزیراعظم کی زیر صدارت ہونے والے قومی اقتصادی کونسل کے اجلاس میں منظوری دی جائے گی۔
بعد ازاں رواں مالی سال کا قومی اقتصادی سروے 9 جون جبکہ پارلیمنٹ میں نئے مالی سال کا بجٹ 10 جون کو پیش کیا جائے گا۔
ذرائع کے مطابق آئندہ مالی سال کے لیے مجوزہ پی ایس ڈی پی کے تحت سڑکوں کی تعمیر کے لیے 170 ارب، پانی کے منصوبوں کے لیے 140 ارب، پاور ڈویژن کے لیے 105 ارب روپے اور ہائر ایجوکیشن کے لیے 50 ارب روپے مختص کرنے کی تجویز ہے۔
اسی طرح نیشنل فوڈ سیکیورٹی کے ترقیاتی منصوبوں کے لیے 4 ارب رکھنے کی تجویز ہے۔
ذرائع کا کہنا تھا کہ انفارمیشن اور صنعت و پیداوار کے لیے تین، تین ارب رکھنے کا امکان ہے، میری ٹائم کے لیے 3.5 ارب روپے، بین الصوبائی رابطے کے لیے ڈیڑھ ارب مختص کرنے کی تجویز ہے۔
