پاکستان کے ارشد ندیم نے ایشین ایتھلیٹکس چیمپین شپ کے جیولن تھرو فائنل کے لیے کوالیفائی کرلیا۔
جنوبی کوریا میں جاری ایشین ایتھلیٹکس کے جیولن تھرو کوالیفائنگ راؤنڈ کے گروپ اے میں پاکستان کے ارشد ندیم نے پہلی باری میں 86.34 میٹر کی تھرو کی۔
اس تھرو کے ساتھ ہی ارشد ندیم نے فائنل میں جگہ بنائی جبکہ بھارتی کھلاڑی یش نے پہلی باری میں 76.67 میٹر کی تھرو کی۔
ارشد ندیم کے بعد پاکستان کے یاسر سلطان نے بھی فائنل میں جگہ بنالی ہے، یاسر سلطان نے پہلی ہی باری میں 76.07 میٹر کی تھرو کرکے فائنل میں جگہ بنائی۔
ایشین ایتھلیٹکس چیمپین شپ میں جیولن تھرو کا فائنل کل کھیلا جائے گا۔
واضح رہے کہ پاکستان کے ارشد ندیم نے پیرس اولمپکس میں جیولن تھرو کے مقابلوں میں نیا اولمپک ریکارڈ قائم کرتے ہوئے طلائی تمغہ حاصل کیا تھا۔
