گورنر خیبر پختونخوا فیصل کریم کنڈی سے امریکا کی قائم مقام سفیر نیٹلی بیکر نے ملاقات کی ہے۔
اسلام آباد میں ہوئی ملاقات میں باہمی دلچسپی کے امور اور دو طرفہ تعاون کے فروغ پر تبادلۂ خیال کیا گیا۔
اس موقع پر قائم مقام امریکی سفیر نے بلوچستان میں اسکول بس پر حملے میں معصوم بچوں کی شہادتوں پر تعزیت کا اظہار کیا۔
ملاقات میں خیبر پختونخوا میں تجارتی و بیرونی سرمایہ کاری سے متعلق امور بھی زیرِ بحث آئے، صوبے کے نوجوانوں کو تکنیکی و فنی تعلیم میں اسکالرشپس کی فراہمی اور اسپورٹس میں صلاحیت رکھنے والے نوجوانوں کو امریکا سمیت دنیا بھر میں مواقع فراہم کرنے پر بھی گفتگو ہوئی۔
ملاقات میں دو طرفہ تجارت کے فروغ کے لیے امریکا اور خیبر پختونخوا سے تجارتی وفود کے تبادلوں کی ضرورت پر زور دیا گیا۔
گورنر فیصل کریم کنڈی نے خیبر پختونخوا میں معدنی شعبے میں سرمایہ کاری کے مواقع سے متعلق قائم مقام امریکی سفیر کو آگاہ کیا۔
گورنر کے پی فیصل کریم کنڈی نے قائم مقام امریکی سفیر کو بتایا کہ خیبر پختونخوا میں دنیا کے بہترین ماربل، گرینائٹ اور دیگر معدنی وسائل ہیں، صوبے میں معدنیات، سیاحتی شعبے، قدرتی وسائل پر عالمی سرمایہ کاری کے خواہاں ہیں، امریکا پاکستان کا ترقیاتی شراکت دار دوست ملک ہے۔
