معروف آئرش ہپ ہاپ بینڈ نیکیپ کے رکن لیام او ہانا پر حزب اللّٰہ کا جھنڈا لہرانے پر دہشت گردی کے قانون کے تحت فردِ جرم عائد کردی گئی۔
لندن کی میٹروپولیٹن پولیس کے مطابق لیام او ہانا پر الزام ہے کہ انہوں نے ایک موسیقی کی تقریب کے دوران حزب اللّٰہ کا جھنڈا ایسے انداز میں دکھایا جو تنظیم کی حمایت کے شبے کو جنم دیتا ہے۔
یہ واقعہ 21 نومبر 2024ء کو لندن کے فورم کینٹش ٹاؤن میں پیش آیا، جہاں او ہانا نے مبینہ طور پر حزب اللّٰہ کے جھنڈے کی نمائش کی۔
پولیس کا کہنا ہے کہ اپریل 2025ء میں اس واقعے کی ویڈیو سامنے آنے پر تحقیقات کا آغاز ہوا، جس کے بعد کاؤنٹر ٹیررازم کمانڈ نے مقدمہ درج کیا۔
او ہانا 18 جون 2025ء کو ویسٹ منسٹر مجسٹریٹس کورٹ میں پیش ہوں گے۔
بینڈ نیکیپ اسرائیل کے غزہ میں حملوں پر شدید تنقید کرتا رہا ہے۔
حالیہ مہینوں میں سامنے آنے والی ویڈیوز میں بینڈ کے ارکان کو برطانوی سیاستدانوں کے خلاف نعرے بازی کرتے اور Up Hamas Up Hezbollah کہتے سنا گیا، جس پر یو کے انسداد دہشت گردی ادارے نے بھی تحقیقات کا آغاز کیا۔
بینڈ کا مؤقف ہے کہ انہوں نے کبھی حماس یا حزب اللّٰہ کی حمایت نہیں کی، اور یہ ویڈیوز سیاق و سباق سے ہٹ کر پھیلائی گئی ہیں تاکہ انہیں فلسطین کی حمایت پر خاموش کروایا جا سکے۔
بینڈ کے منیجر ڈینیئل لیمبرٹ کا کہنا ہے کہ یہ تنازعہ صرف فلسطین پر بات کرنے والوں کو خاموش کروانے کی کوشش ہے اور یہ صرف بینڈ پر نہیں بلکہ آئندہ نسل کے نوجوان فنکاروں کو ڈرانے کا حربہ ہے۔
