(ویب ڈیسک)بھارت میں 7 ماہ کے دوران 25 آدمیوں سے شادی کرکے انہیں لوٹنے والی خاتون کوگرفتارکرلیاگیا۔
بھارتی میڈیا کے مطابق بھوپال میں پولیس نے 23 سالہ خاتون انورادھا پاسوان کو شادی کرکے لوٹنے کے الزام میں گرفتار کیا ہے،وہ مختلف ریاستوں میں 7 ماہ کے دوران 25 آدمیوں سے شادی کرکے انہیں لوٹ کر فرار ہوگئی تھی جس پر اسے “لوٹ اور سکوٹ دلہن” کا نام دیا گیاتھا۔
پولیس کے مطابق یہ واقعہ اس وقت منظرعام پر آیا جب سوئی مادھوپور کے رہائشی وشنو شرما نے پولیس کو شکایت درج کروائی کہ ایجنٹ نے 2 لاکھ روپے لے کر 20 اپریل کو انورادھا سے کورٹ میرج کروائی اور وہ 2 مئی کو تمام قیمتی چیزیں لے کر فرار ہوگئی۔
پولیس نے بتایا کہ خاتون نے شادی کیلئے قانونی دستاویزات کا استعمال کیا، کچھ دنوں تک شوہر کے ساتھ رہی اور پھر رات کے وقت سونے کے زیورات، نقدی اور الیکٹرانک اشیا چوری کرکے فرار ہوگئی جبکہ وشنو شرما سے شادی کرنے کے بعد خاتون نے بھوپال میں ایک اور آدمی سے بھی شادی کی۔
یہ بھی پڑھیں:اس سال مون سون میں زیادہ بارشیں متوقع ہیں: این ڈی ایم اے
پولیس نے مزید بتایا کہ انورادھا اس سے قبل اترپردیش کے مہاراج گنج کے ایک ہسپتال میں کام کرتی تھی اور اپنے شوہر کے ساتھ گھریلو جھگڑے کے بعد بھوپال چلی گئی جہاں وہ مبینہ طور پر ایک گروہ میں شامل ہوگئی جو مقامی ایجنٹوں کے ذریعے کام کرتا تھا،یہ ایجنٹس واٹس ایپ پردلہنوں کی تصویریں شیئر کرکے شادی کروانے پر کلائنٹس سے 2 سے 5 لاکھ روپے تک وصول کرتے تھے۔
