بھارت کے خلائی تحقیقاتی ادارے آئی ایس آر او کو 18 مئی 2025 کو ایک اہم مشن میں ناکامی کا سامنا کرنا پڑا جب PSLV-C61 راکٹ کے ذریعے زمین کی نگرانی کے سیٹلائٹ کو مدار میں پہنچانے کی کوشش بری طرح ناکام ہو گئی۔
یہ مشن صبح 5:59 بجے سری ہری کوٹا کے ستیش دھون اسپیس سینٹر سے روانہ ہوا۔
راکٹ کے ابتدائی دو مراحل نے معمول کے مطابق کام کیا، لیکن تیسرے مرحلے میں ایک تکنیکی خرابی کے باعث راکٹ مطلوبہ مدار تک نہ پہنچ سکا، جس کے نتیجے میں سیٹلائٹ ضائع ہو گئی۔
آئی ایس آر او کے چیئرمین وی نارائنن نے تصدیق کی کہ مشن مکمل نہیں ہو سکا اور اس ناکامی کی مکمل تکنیکی جانچ کے لیے ایک کمیٹی تشکیل دی گئی ہے۔
ای او ایس-نائن نامی سیٹلائٹ ایک جدید سی بینڈ سنتھیٹک ایپرچر ریڈار سے لیس تھی جو ہر قسم کے موسم اور روشنی کی حالت میں زمین کی نگرانی کر سکتی تھی۔
اس سیٹلائٹ کا مقصد زراعت، جنگلات، پانی کے ذخائر، اور قدرتی آفات کی نگرانی میں مدد فراہم کرنا تھا۔
