مشہور گیم فورٹ نائٹ امریکا میں آئی فون صارفین کے لیے پھر دستیاب ہو گیا۔ ایپک گیمز کے مطابق صارفین گیم کو ایپک گیمز اسٹور اور آلٹ اسٹور سے ڈاؤن لوڈ کر سکیں گے۔
ٹیکنالوجی کمپنی ایپل نے فورٹ نائٹ کو تقریباً پانچ برس قبل اپنے ایپ اسٹور سے خارج کر دیا تھا۔ ایپل کی جانب سے ایسا ایپک گیمز کے اپنے گیم میں اِن ایپ پے منٹ سسٹم پیش کرنے کے بعد کیا گیا تھا۔
تاہم، دونوں کمپنیوں کے درمیان چلنے والی طویل عدالتی جنگ کے فیصلے میں ایپل پر لازم قرار دیا گیا کہ کمپنی ایپ سے باہر ہونے والی خریداری کی فیس نہیں لے گی۔ جس کے بعد گیم امریکا میں آئی فون صارفین کے لیے دوبارہ دستیاب ہوگیا ہے۔
فیصلہ آنے کے تھوڑی دیر بعد ہی سی ای او ٹِم سوئینی نے ایک پوسٹ میں کہا کہ ایپک نے فورٹ نائٹ کو امریکا میں آئی او ایس پر واپس لانے کا ارادہ کیا ہے۔
انہوں نے ایپل کو ایک پیشکش کرتے ہوئے کہا کہ اگر کمپنی کورٹ کا فرکشن-فری، ایپل-ٹیکس-فری فریم ورک کا اطلاق عالمی سطح پر کرتی ہے تو گیم ایپ اسٹور پر واپس آجائے گا اور اس معاملے پر موجودہ اور مستقبل کے مقدموں کو ختم کر دیا جائے گا۔
