(24نیوز)پاکستان رینجرز (سندھ) اور سندھ پولیس نے انٹیلی جنس معلومات کی بنیاد پر کراچی کے علاقے لیاری سے کالعدم بلوچ ملیٹنٹ تنظیم سے تعلق رکھنے والے ملزم درویش عرف ساگر کو گرفتار کر لیا ہے۔ ملزم کے قبضے سے اسلحہ، ایمونیشن اور دستی بم بھی برآمد ہوئے ہیں، درویش عرف ساگر محلہ سرگواد لیاری کراچی کا رہائشی ہے۔
ملزم نے 2015 میں بی ایس او آزاد میں شمولیت اختیار کی اور 2018 میں کالعدم بی ایل اے کے کارندے فاروق بلوچ کے گروپ میں شامل ہو گیا۔ وہ فاروق بلوچ اور مجید عرف بابا کے ساتھ مل کر کالعدم بی ایل اے اور بی ایل ایف کی سہولت کاری میں ملوث رہا۔
تفتیش کے دوران ملزم نے اعتراف کیا کہ وہ بلوچ مسنگ پرسنز کی سرگرم رکن حیام بلوچ کا فرنٹ مین تھا اور خودکش خاتون ماہل بلوچ کی ذہن سازی اور سہولت کاری میں بھی اس کا کردار تھا۔
یہ بھی دیکھیں: پراپرٹی،بینک ٹرانزیکشن اور گاڑیوں کی خریدوفروخت پر پابندی لگ گئی
گرفتار ملزم نے بتایا کہ وہ بلوچ عسکریت پسند تنظیموں کو علاج معالجہ اور محفوظ پناہ گاہیں فراہم کرنے میں بھی ملوث رہا ہے۔ اس کے قریبی ساتھی فاروق بلوچ، مجید عرف بابا، فراز عرف گنج، ناصر ذکری، شہزاد ذکری سمیت دیگر بلوچستان اور کراچی میں سیکیورٹی فورسز پر دہشت گردی کی متعدد کارروائیوں میں ملوث ہیں۔
ملزم کے دو ساتھی پرویز ذکری اور ظفر عرف ماما جعفر ایکسپریس ٹرین حملے میں سیکیورٹی فورسز سے مقابلے میں مارے جا چکے ہیں۔
ملزم حوالہ ہنڈی کے ذریعے رقم وصول کر کے مختلف بلوچ دہشت گرد تنظیموں میں تقسیم کرنے اور سوشل میڈیا پر پاکستان مخالف مہم چلانے میں بھی ملوث رہا ہے۔ گرفتار ملزم کو اسلحہ و ایمونیشن سمیت مزید قانونی کارروائی کے لیے پولیس کے حوالے کر دیا گیا ہے۔
