پاکستان سپرلیگ (پی ایس ایل) 10 کے 28 ویں میچ میں ملتان سلطانز نے کوئٹہ گلیڈی ایٹرزکو جیت کے لیے 186 رنز کا ہدف دے دیا۔
راولپنڈی میں کھیلے جانے والے میچ میں ملتان سلطانز نے کوئٹہ گلیڈی ایٹرز کے خلاف ٹاس جیت کر بیٹنگ کا فیصلہ کیا اور 20 اوورز میں 7 وکٹوں کے نقصان پر 185 رنز بنائے۔
ملتان سلطانز کی جانب سے یاسر خان نے جارحانہ آغاز فراہم کیا اور صرف 25 گیندوں پر 45 رنز کی شاندار اننگز کھیلی، جس میں 6 چوکے اور 2 چھکے شامل ہیں۔
مڈل آرڈر میں طیب طاہر نے 36 رنز 24 گیندوں پر بنائے، جبکہ اختتامی اوورز میں شاہد عزیز نے 14 گیندوں پر 29 رنز کی تیز رفتار اننگز کھیل کر ٹیم کا اسکور بہتر بنانے میں کلیدی کردار ادا کیا۔
دوسری جانب کوئٹہ گلیڈی ایٹرز کی بولنگ میں عثمان طارق سب سے کامیاب بولر رہے، جنہوں نے 32 رنز دے کر 3 اہم وکٹیں حاصل کیں۔
محمد وسیم نے آخری اوور میں عمدہ بولنگ کرتے ہوئے صرف 26 رنز دے کر 1 وکٹ حاصل کی، جبکہ فہیم اشرف اور خُرم شہزاد نے بھی ایک ایک وکٹ حاصل کی۔
