امریکی خاتون اول ملانیا ٹرمپ کا مجسمہ انکے آبائی ملک سلووینیا میں چرا لیا گیا۔
غیرملکی میڈیا کے مطابق سلووینیا میں پولیس نے بتایا ہے کہ چوری کی یہ واردات روزنو نامی گاؤں میں پیش آئی، جہاں امریکی خاتون اول ملانیا ٹرمپ کا کانسی کا بنا مجسمہ نصب تھا۔
پولیس کے مطابق اس معاملے کی تفتیش جاری ہے۔
میڈیا رپورٹس کے مطابق یہ مجسمہ 2020ء میں صدر ڈونلڈ ٹرمپ کے پہلے دور حکومت میں وسطی سلووینیا کے علاقے سیونیکا کے قریب نصب کیا گیا تھا۔
اس کانسی کے مجسمے کے چوری ہونے سے قبل اس مجسمے کو اصل لکڑی سے تیار کیا گیا تھا، جسے 2020ء میں جلا دیا گیا تھا۔
مجسمے کے حوالے سے بات کرتے ہوئے مجسمہ ساز بریڈ ڈاؤنی نے میڈیا کو بتایا ہے کہ وہ ہمیشہ سے لکڑی کے مجسمے کا کانسی میں ورژن بنانا چاہتےتھے، تاکہ مختلف اداروں اور آرٹ گیلریز میں اس کی نمائش کی جائے۔
واضح رہے کہ امریکی خاتون اول کا تعلق سلووینیا کے ایک چھوٹے قصبے سیون شیا سے ہے، جس کے آبادی 5 ہزار افراد پر مشتمل ہے۔
