(ویب ڈیسک) پنجاب انسٹیٹیوٹ آف نیورو سائنسز لاہور اور بیسٹا نیورو انسٹیٹیوٹ، میلان اٹلی کے درمیان ایک تاریخی مفاہمتی یادداشت پردستخط ہوگئے۔
اس کے تحت بیسٹا انسٹی ٹیوٹ کے سینیئر ریزیڈنٹس اب PINS میں روٹیشن کے لیے آئیں گے جبکہ پنجاب انسٹیٹیوٹ آف نیوروسائنسز کے سینئر رجسٹرارز اور اعلیٰ درجے کے فیکلٹی ممبران کو اٹلی میں نیورو سرجری کی تربیت حاصل کرنے کا موقع فراہم کیا جائے گا،اس شراکت داری کے تحت تمام ویزا،قیام، اور دیگر انتظامات کی ذمہ داری میزبان اطالوی ادارہ خود اٹھائے گا جس سے پاکستانی نیورو سرجنز کو بین الاقوامی معیار کی تربیت بآسانی حاصل ہو سکے گی۔
ایگزیکٹو ڈائریکٹرپنجاب انسٹی ٹیوٹ آف نیوروسائنسز پروفیسر آصف بشیر نے اس موقع پر کہا کہ یہ معاہدہ نوجوان نیورو سرجنز کے لیے ایک سنگ میل ثابت ہو گا،انہیں نہ صرف جدید ترین نیورو سرجیکل مہارتیں سیکھنے کا موقع ملے گا بلکہ بین الاقوامی ماحول میں کام کرنے کا قیمتی تجربہ بھی حاصل ہو گا،ان تمام کوششوں کا مقصد نوجوان ڈاکٹرز کو سرجری کی جدید مہارتوں سے لیس کر کے مریضوں کو بہتر سے بہترعلاج معالجے کی سہولیات فراہم کرنا ہے۔
یہ بھی پڑھیں:دنیا بھر میں آج “ہائی بلڈ پریشر “کا عالمی دن
پروفیسرآصف بشیر کامزید کہنا تھا کہ دنیا کے دیگر بڑے نیورو سرجیکل مراکز کے ساتھ بھی تکنیکی تعاون کے حصول معاہدے کیے جائیں گے تاکہ ہمارے نوجوان ڈاکٹرز کو عالمی معیار کی پیشہ ورانہ ٹریننگ دیکر مقابلہ کرنے کے قابل بنایا جا سکے۔ اور پاکستان میں نیورو سرجری کے شعبے کو مزید ترقی دی جا سکے،یہ قدم پنجاب حکومت کی پالیسی کے تحت PINS کی بین الاقوامی معیار کی تربیت و تحقیق کے لیے مستقل کوششوں کا مظہر ہے، اور ملک میں طبی تعلیم و خدمات کے ایک نئے دور کا آغاز ہے جس کا براہ راست فائدہ مریضوں کو پہنچے گا۔
