کراچی (اسٹاف رپورٹر) قومی خواتین ٹی ٹوئنٹی ٹورنامنٹ میں جمعے کوچیلنجرز اور اسٹرائیکرز نے کامیابی حاصل کی۔ نیشنل بینک اسٹیڈیم میں چیلنجرز نے اسٹارز کو 5 وکٹوں سے ہرا یا۔ اسٹارز نے 9 وکٹوں پر 108 رنز بنائے۔کائنات حفیظ 48 رنز کے ساتھ ٹاپ اسکورر رہیں، صدف شمس نے 5 وکٹیں حاصل کیں۔ چیلنجرز نے ہدف آخری اوور میں 5 وکٹوں پرحاصل کرلیا۔ عالیہ ریاض 48 ،رامین شمیم نے28 رنز ناٹ آؤٹ بنائے ، انوشا ناصر نے 3 وکٹیں حاصل کیں۔ اوول اکیڈمی میں اسٹرائیکرزنے انونسیبلز کو 7 وکٹوں سے شکست دی۔ انونسیبلز نے 5 وکٹوں پر 143 رنز بنائے۔ کپتان منیبہ علی 67 رنز بناکر ٹاپ اسکورر رہیں۔ اسٹرائیکرز نے 18 ویں اوور میں 3 وکٹوں پر مطلوبہ اسکور پورا کرلیا۔ ایمان فاطمہ 10 چوکوں اور2 چھکوں کی مدد سے74 رنز پرناٹ آؤٹ رہیں۔
