پاک فوج کے شعبہ تعلقات عامہ (آئی ایس پی آر) نے نیا ملی نغمہ یلغار ہے جاری کر دیا جو قوم کے جذبہ حب الوطنی، مسلح افواج کی قربانیوں اور اتحاد و استقامت کو زبردست خراج تحسین پیش کرتا ہے۔
حسنین علی پراچہ کی آواز میں گایا گیا یہ ولولہ انگیز نغمہ ہر اس جوان کی جدوجہد کو سلام پیش کرتا ہے جو سرحدوں پر، میدان جنگ میں یا پس پردہ دشمن کے خلاف ڈٹ کر کھڑا ہے۔
یہ نغمہ آئی ایس پی آر کے آفیشل سوشل میڈیا پلیٹ فارمز پر جذبات انگیز کیپشن کے ساتھ جاری کیا گیا ہے جس میں قوم کو پیغام دیا گیا کہ وہ ثابت قدمی، قربانی اور مادر وطن سے وفا کے جذبے کو برقرار رکھے۔
نغمے کا مقصد قوم کے اندر اتحاد، ہمت، اور قومی وقار کا شعور اُجاگر کرنا ہے۔
آئی ایس پی آر کے مطابق یلغار ہے صرف ایک نغمہ نہیں بلکہ ہر پاکستانی کے دل کی آواز ہے اس میں ہر سپاہی کے عزم اور قربانی کو سراہا گیا ہے۔
نغمے کے بول نہایت جذبہ انگیز اور روح کو جھنجھوڑ دینے والے ہیں جبکہ اس کی ویڈیو میں فوجی آپریشنز، قومی پرچم، شہداء کی تصاویر اور عوامی یکجہتی کے مناظر کو نہایت خوبصورتی سے پیش کیا گیا ہے۔
واضح رہے کہ گزشتہ ہفتے بھارت کی جانب سے پاکستان پر بلااشتعال حملوں کے نتیجے میں 50 سے زائد پاکستانی شہری اور فوجی شہید ہوئے۔
پاکستان نے اس جارحیت کا منہ توڑ جواب دیتے ہوئے 6 بھارتی لڑاکا طیارے مار گرائے، دشمن کا میزائل ڈیفنس سسٹم کو نقصان پہنچایا، متعدد بھارتی ڈرونز تباہ کیے۔
پاکستان نے آپریشن بنیان مرسوس کے نام سے ایک اہم دفاعی کارروائی میں بھارت کے اندر کئی اہم اہداف کو نشانہ بنایا۔
