ابوظبی(24 نیوز) متحدہ عرب امارات کی تمام ساتوں ریاستوں کو ملانے کیلئے الاماراتی ٹرین نیٹ ورک اتحاد ریل نے اعلان کیا ہے کہ سن 2026 میں مسافر سروس شروع کی جا رہی ہے۔
دبئی کی مشہور میٹرو سروس کے برعکس، جو صرف دبئی کے مختلف علاقوں کے درمیان چلتی ہے، اتحاد ریل پورے ملک کے ساتوں امارات کو جوڑے گی اور سعودی عرب اور عمان جیسے ہمسایہ ممالک کو بھی جوڑ دے گی ۔
یہ منصوبہ اماراتی ریاستوں ابوظبی، دبئی، شارجہ اور فجیرہ میں اسٹیشنوں کے ذریعہ مسافر سروس کا آغاز کرنے جارہی ہے۔
اماراتی حکام کے مطابق، اتحاد ٹرین متحدہ عرب امارات میں تیز، آرام دہ اور سستی سفر کی سہولت فراہم کرے گا۔
متحدہ عرب امارات میں رہنے والے افراد کے لیے یہ ریل نیٹ ورک مختلف امارات تک آسان رسائی اور خلیجی ممالک کے درمیان بغیر کسی مشکل کے سفر کے مواقع فراہم کرے گی۔
اہم اسٹیشنز
ابوظہبی: خلیفہ سٹی اور الرویس کے قریب اسٹیشنز رہائشی، صنعتی، اور ابوظبی ائیرپورٹ کے علاقوں کو جوڑے گی۔
دبئی: اتحار ٹرین کا مرکزی اسٹیشن دبئی پروڈکشن سٹی میں واقع جمیرا گالف اسٹیٹس کے قریب متوقع ہے، جو اہم شاہراہوں اور رہائشی کمیونٹیز تک آسان رسائی فراہم کرے گا۔
شارجہ: یونیورسٹی سٹی کے قریب اسٹیشن طلباء اور پروفیشنل افراد کے لیے سہولت فراہم کرے گا اور شارجہ ائیرپورٹ کے قریب ہوگا۔
فجیرہ: سکمکم کے علاقے میں اسٹیشن مشرقی خطے کو باقی اماراتی ریاستوں سے منسلک کردے گا۔
