بھارتی عدالت نے شوہر سے علیحدگی کے بعد بچے کی ذمہ داری اٹھانے والی ماں کو نان نفقے کا حقدار قرار دے دیا، دلی ہائیکورٹ نے بچے کی دیکھ بھال کیلئے نوکری چھوڑنے والی ماں کو نان نفقے کا حق دار قرار دیا۔
بھارتی میڈیا کے مطابق ہائیکورٹ نے ماتحت عدالت کا خاتون اور نابالغ بیٹے کو نان نفقہ دینے کا فیصلہ برقرار رکھتے ہوئے کہا کہ بچے کی دیکھ بھال کیلئے ملازمت چھوڑنا مرضی سے کام ترک کرنے کے طور پر نہیں دیکھا جا سکتا۔
دلی ہائیکورٹ کے جج نے کہا کہ نابالغ بچے کی دیکھ بھال کی ذمہ داری اس پر آتی ہے جس کے پاس بچے کی تحویل ہوتی ہے۔
بھارتی میڈیا کے مطابق ہائیکورٹ نے شوہر کو بیوی کو ساڑھے 7 ہزار اور بچے کو ساڑھے 4 ہزار روپے دینے کا حکم دیا، ماتحت عدالت نے شوہر کو بیوی، بچے دونوں کو فی کس ساڑھے 7 ہزار روپے ماہانہ دینے کا حکم دیا تھا۔
شوہر نے ماتحت عدالت کا فیصلہ دلی ہائیکورٹ میں چیلنج کیا تھا۔
