کراچی:
ایڈیشنل ڈسٹرکٹ اینڈ سیششن جج جنوبی نے 53 کروڑ روپے کے بینک فراڈ کیس میں عاطف خان کی درخواست ضمانت اور اداکارہ نادیہ حسین کی عبوری ضمانت کی توثیق پر فیصلہ محفوظ کرلیا۔
ایڈیشنل ڈسٹرکٹ اینڈ سیششن جج جنوبی کی عدالت میں 53 کروڑ روپے کے بینک فراڈ کے مقدمے کی سماعت کی جہاں اداکارہ نادیہ حسین، فیصل اور امتیاز عدالت میں پیش ہوئے اور تینوں ملزم عبوری ضمانت پر ہیں۔
عدالت نے نادیہ حسین کے شوہر عاطف خان کی درخواست ضمانت اور اداکارہ نادیہ حسین کی عبوری ضمانت کی توثیق کی درخواست پر فیصلہ محفوظ کرلیا اور عدالت نے ریمارکس دیے کہ دونوں ملزمان کی درخواستوں پر فیصلہ جلد سنایا جائے گا۔
ملزم امتیاز کے وکیل نے سماعت کے دوران اپنے دلائل میں کہا کہ یہ مقدمہ بدنیتی کی بنیاد پر بنایا گیا ہے، ملزم امتیاز پرجعلی چیک جاری کرنے کا الزام جھوٹا ہے، جو چیک آئے یا جاری کیے اسکی انٹریاں موجود ہیں۔
انہوں ے کہا کہ امتیاز نے ای میلز بھی کیں اور تمام ریکارڈ بھی فراہم کردیا تاہم عدالت نے ملزم فیصل اور امتیاز کی درخواست ضمانت کی سماعت ملتوی کردی۔
